„Veðrið þessa helgina verður einna sólríkast á Suður- og Vesturlandi. Hins vegar verða næstu dagar nokkuð vindasamir og fremur svalir. Mildast verður þó syðst á landinu,“ segir Sigurður Þ. Ragnarsson veðurfræðingur, betur þekktur sem Siggi Stormur, um helgarveðrið.
„Spárnar hafa verið nokkuð stöðugar þessa vikuna og benda til að það verði víðast bjart veður á sunnan- og vestanverðu landinu um helgina, annars lítils háttar væta, einkum fyrir norðan. Það sem skyggir á gleðina yfir þessu bjarta veðri er að það verður næðingur af norðri og því svalt,“ segir Sigurður og býst við fimm til átta stiga hita fyrir norðan.
„En í hnjúkaþeysáhrifum syðra má búast við að hitinn skrölti þetta upp undir 15 stig á laugardeginum. Sunnudagurinn er hins vegar að koma inn sem fremur þungbúinn og með vætu en framan af sunnudegi ætti hann að ná að verða nokkuð bjartur suðvestanlands með hita að 12-13 stigum.“
Sigurður segir að kalt loft sé yfir landinu og til marks um það mældist frost í byggð á Ísafirði í nótt.
„Það var reyndar ekki nema 0,1 gráða undir frostmarki, en það sýnir hve svalur loftmassinn sem er yfir landinu. Hlýrra loft er ekki alveg í augsýn,“ segir hann að lokum en hér að neðan má yfirlit yfir veðrið um helgina á landinu öllu.
