Sífellt fleiri Repúblikanar snúa baki við Trump

Þing­menn innan full­trúa­deildar Banda­ríkja­þings munu á morgun greiða at­kvæði um hvort á­kæra eigi Donald Trump, sitjandi Banda­ríkja­for­seta, til em­bættis­missis ef Mike Pence, sitjandi vara­for­seti Banda­ríkjanna, á­kveður ekki að beita 25. við­auka banda­rísku stjórnar­skráarinnar til að víkja Trump úr em­bætti.

Þing­mennirnir munu í nótt greiða at­kvæði um hvort það eigi að kalla form­lega eftir því að Pence beiti 25. við­auka vegna hlut­verks Trumps í ó­eirðunum við þing­húsið í Was­hington, D.C., í síðustu viku. Pence hefur þó verið hikandi við það og því voru á­kærur til em­bættis­missis kynntar í gær en margir óttast hvað muni gerast þar til Joe Biden tekur við em­bætti for­seta.

Þingmenn virðast flýja Trump

Nokkrir þing­menn Repúblikana hafa lýst því yfir að þeir séu hlynntir því að Trump verði á­kærður til em­bættis­missis en ef það gerist verður það í annað sinn sem Trump er á­kærður. Meðal þeirra sem eru sagðir styðja á­kærurnar eru alla vega tólf full­trúa­deildar­þing­menn, en þrír þingmenn Repúblikana hafa tilkynnt það opinberlega að þeir muni kjósa með því að ákæra Trump, þar á meðal Liz Chen­ey, dóttir Dick Chen­ey, fyrrum vara­for­seta Banda­ríkjanna.

Þá er leið­togi Repúblikana innan öldunga­deildarinnar, Mitch McConnell, sagður vera á­nægður með það að full­trúa­deildin á­kæri Trump, sam­kvæmt frétt New York Times um málið, þar sem hann telur að um skýrt em­bættis­brot er að ræða og að brott­rekstur Trumps myndi vera til þess að Repúblikana­flokkurinn yrði sam­einaðri.

Aðrir hátt settir Repúblikanar, til að mynda Kevin Mc­Cart­hy, leið­togi minni­hlutans innan full­trúa­deildarinnar, hafa ekki beint sam­þykkt að Trump verði á­kærður en hafa þó ekki barist fyrir því að Repúblikanar kjósi gegn á­kærunum. Ljóst er því að mikill klofningur á sér stað innan flokksins um þessar mundir

Áframhaldandi „norna­veiðar“

Fimm létust eftir ó­eirðirnar en Trump neitaði til að byrja með að for­dæma að­gerðir stuðnings­manna sinna heldur virtist frekar hvetja þá til dáða. Degi síðar sagðist hann loks for­dæma at­vikið en hann virðist þó, að á­kveðnu leiti, reyna að rétt­læta gjörðir fólksins sem braust inn í þing­húsið og líkja ó­eirðunum við Black Lives Matter mót­mælin, sem fóru að mestu frið­sam­lega fram.

Eftir að Twitter-að­gangi hans var eytt síðast­liðinn föstu­dag hefur Trump lítið tjáð sig en að­spurður í morgun um hvort það stæði til að hann segði af sér, sagðist hann ekki vilja neitt of­beldi. Þá hélt hann á­fram og sagði að að­gerðir Demó­krata til að koma honum úr em­bætti væru „á­fram­hald á stærstu norna­veiðum sögunnar.“

Málið teygi sig fram yfir embættistöku Bidens

Meiri­hluti þing­manna innan full­trúa­deildarinnar þarf að sam­þykkja á­kærurnar og þar sem Demó­kratar eru í meiri­hluta er lík­legt að þær verði sam­þykktar. Öldunga­deildin tekur síðan á­kærurnar fyrir og fara þar fram hálf­gerð réttar­höld en tveir þriðju þing­manna þurfa þar að sam­þykkja á­kærurnar ef víkja á Trump úr em­bætti.

Gera má ráð fyrir að ef réttarhöldin fara fram að þau teygi sig fram yfir 20. janúar, þegar Biden tekur við embætti. Demókratar og Repúblikanar eru nú með jafn marga þingmenn innan öldungadeildarinnar eftir að hafa unnið bæði þingsætin sem stóðu til boða í Georgíu. Óljóst er hvort nógu margir þingmenn Repúblikana myndu ganga til liðs við Demókrata ef Trump verður ákærður.