„Herra forseti. Síðasta sumar reyndi ég að saga af mér puttann, reyndar ekki viljandi, það var óvart.“ Svona hófst ræða varaþingmanns Vinstri grænna, Fjölnis Sæmundssonar á þinginu í dag. Í ræðunni, sem hann flutti undir liðnum störf þingsins, gerði hann heilbrigðisþjónustu í Rangárvallasýslu að umtalsefni.

Hann sagðist hafa verið í Fljótshlíð og þurft að fara 10 kílómetra langa leið á heilsugæslu, til að láta sauma puttann á sig. Þar hafi hann komið að lokuðum dyrum. Á lögreglustöðinni hafi hann fengið þau svör að hann fengi ekki læknisþjónustu í sýslunni eftir kvöldmat. „Ég fór því í sjúkrabíl 50 km leið á Selfoss fram hjá heilsugæslunni á Hellu í leiðinni þar sem ég var saumaður saman.“

Fjölnir segir að fyrir 15 árum hafi hann búið í Fljótshlíð og þá hafi verið hægt að sauma allan sólarhringinn „og bregðast við öllum mínum vandamálum.“ Hann segir að heilsa fólks í Rangárvallasýslu hafi ekki batnað mikið á þessum 15 árum og því hafi heldur ekki fækkað. Nú séu þar fleiri ferðamenn. „Þetta er sá staður á landinu þar sem hvað alvarlegustu umferðarslysin hafa orðið á undanförnum árum. Það merkilega er að sjúkrabíllinn sem flutti mig frá Hvolsvelli á Selfoss er líka farinn, hann er farinn frá Hvolsvelli þannig að það er enn lengri útkallstími fyrir sjúkrabifreið. Við erum búin að heyra um þessi slys undir Eyjafjöllum og nálægt Vík undanfarnar vikur.“

Í ræðu sinni sagði Fjölnir að þetta væri auðvitað engin þjónusta fyrir íbúa á þessu svæði og fyrir þær þúsundir ferðamanna sem um sýsluna fari. „Mér var reyndar sagt af lögreglumanninum að ef ég hefði verið meira slasaður hefði læknirinn komið og úrskurðað mig látinn, það væri það eina sem hann myndi gera eftir kvöldmat.“