Sjúkratryggingar Íslands hafa fellt brott kröfu um tveggja ára starfsreynslu talmeinafræðinga sem skilyrði fyrir greiðsluþátttöku Sjúkratrygginga.

Þetta kemur fram í tilkynningu frá Sjúkratryggingin.

Þar segir einnig að samningur um þjónustu sjálfstætt starfandi talmeinafræðinga hafi verið framlengdur um sex mánuði.

Reiknað er með að nýir samningar taki við að sex mánuðum liðnum.

„Þetta er mikilvægt skref. Ég bind miklar vonir við að vel takist til með nýjan samning að sex mánuðum liðnum sem færir þessa mikilvægu þjónustu í gott horf fyrir þá sem á henni þurfa að halda en það eru að langstærstum hluta börn,“ er haft eftir Willum Þór Þórssyni, heilbrigðisráðherra, í tilkynningunni.

Haft er eftir Maríu Heimisdóttur, forstjóra Sjúkratrygginga, að það hafi verið mjög mikilvægt að samningurinn hafi verið framlengdur og að fjármagn hafi verið tryggt til að hægt væri að fella niður tveggja ára ákvæðið.

„Þannig skapist svigrúm fyrir aðila til að vinna áfram í sameiningu að þessari mikilvægu þjónustu og þróun hennar, ekki síst með hagsmuni barna í huga,“ er jafnframt haft eftir Maríu.

Í tilkynningunni segir einnig að starfshópur skipaður af heilbrigðisráðherra vinni nú að endurskoðun á skipulagi þjónustu talmeinafræðinga með heildstæðum tillögum um þjónustu þeirra við börn.

Reiknað er með að nýir samningar að loknum sex mánuðum byggi á niðurstöðu vinnu starfshópsins.