Starfsgreinasamband Íslands og Samband íslenskra sveitarfélaga skrifuðu í dag undir kjarasamning. Samningurinn mun gilda frá 1. janúar 2020 til 30. september 2023 samþykki félagsmenn samninginn.

Samningurinn verður kynntur félagsmönnum á næstu dögum og vikum en gert er ráð fyrir að atkvæðagreiðslu ljúki 10. febrúar.

Tekið er upp nýtt ákvæði að félagsmenn sem starfað hafa samfellt í 3 ár geta fengið launað leyfi í samtals í þrjá mánuði til að stunda viðurkennt starfsnám.

Laun félagsmanna hækka þá um 90 þúsund krónur á tímabilinu 1. janúar 2020 til 1. janúar 2022. Þann 1. janúar 2023 hækka laun í samræmi við hækkanir á almennum vinnumarkaði. Félagsmenn fá greidda eingreiðslu upp á samtals 195 þúsund krónur vegna þess hversu lengi það hefur dregist að gera kjarasamning. Miðað er við fullt starf á tímabilinu 1. apríl til 31. desember 2019. Til frádráttar kemur 125.000 kr. innágreiðsla frá því í október 2019. Persónuuppbót sem greiðist 1. maí ár hvert og nemur 50.450 krónur fyrir fullt starf árið 2020. Desemberuppbót hækkar úr 115.850 krónum árið 2019 í 124.750 krónur árið 2022.

Lágmarksorlof hjá öllum starfsmönnum verður 30 dagar og verða markviss skref tekin til styttingar vinnuvikunnar. Vinnuvikan mun frá 1. janúar 2021 styttast um samtals 65 mínútur fyrir fólk í fullu starfi.

Sérstakur Félagsmannasjóður verður stofnaður á næstu mánuðum með það markmið að stíga skref til jöfnunar lífeyrisréttinda milli starfsmanna á almennum vinnumarkaði og opinberra starfsmanna.

Atvinnurekandi ber að greiða mánaðarlegt framlag í sjóðinn sem nemur 1,5 prósent af heildarlaunum félagsmanna og er úthlutað úr sjóðnum 1. febrúar ár hvert. Allir félagsmenn í fullu starfi fá því greiddar 61.000 krónur þann 1. febrúar næskomandi. Starfsmenn sem eru ekki í fullu starfi fá greiðslu miðað við starfstíma og starfshlutfall.

Starfsgreinasambandið mun áfram taka fullan þátt í starfshópi aðila opinbera vinnumarkaðarins sem fjallar um fyrirkomulag vaktavinnu og starfskjör vaktavinnufólks. Nái starfshópurinn niðurstöðu um frekari breytingar munu samningsaðilar taka upp viðræður um með hvaða hætti þær verða innleiddar.

Starfsgreinasambandið segir hægagang í þeirri vinnu og segja það alfarið á ábyrgð samningarnefndar ríkisins.