Samtök fyrirtækja í sjávarútvegi ætla að gera allt sem í þeirra valdi stendur til að styðja við stjórnvöld vegna ákvörðunar þeirra að grípa til aðgerða í því skyni að auka traust á íslensku atvinnulífi.

Ríkis­stjórnin á­kvað á fundi sínum í morgun að grípa til að­gerða í kjölfar afhjúpunar á meintum glæpum Samherja í Namibíu. Aukið gagn­sæi í rekstri, úr­bætur á fisk­veiðum á al­þjóða­vett­vangi og varnir gegn hags­muna­á­rekstrum og mútu­brotum eru á meðal þeirra að­gerða sem gripið verður til.

„Samtök fyrirtækja í sjávarútvegi (SFS) munu gera allt sem í þeirra valdi stendur til þess að styðja við stjórnvöld, þannig að innleiða megi tilhlýðilegar aðgerðir sem snerta fyrirtæki í sjávarútvegi,“ segir í tilkynningu SFS.

„Líkt og kom fram í yfirlýsingu SFS í fyrri viku, vegna frétta af starfsemi Samherja í Afríku, er afstaða samtakanna skýr og afdráttarlaus. Íslensk fyrirtæki eiga að fylgja lögum, bæði heima og erlendis, og almennt að viðhafa góða viðskipta- og stjórnarhætti. Ásakanir á hendur fyrirtækinu eru alvarlegar og það er verkefni viðeigandi stjórnvalda að rannsaka og taka afstöðu til þeirra,“ skrifar Heiðrún Lind Marteinsdóttir, framkvæmdastjóri SFS.

SFS leggi áherslu á að þau vilji vera fyrirmynd og í fremstu röð í heiminum þegar kemur að sjávarútvegi.

„Á Íslandi er fiskveiðistjórnarkerfi sem er leiðandi á heimsvísu þegar litið er til sjálfbærrar nýtingar á fiskistofnum, auk þess sem samvinna sjávarútvegsfyrirtækja við íslensk iðn- og tæknifyrirtæki hefur aukið virði auðlindarinnar umtalsvert. Samvinnan hefur getið af sér nýja auðlind í formi hugvits og þekkingar.“

„Allt þetta gerir það að verkum að við gerum kröfur til sjávarútvegsins, bæði sem vinnuveitanda og útflutningsgreinar. Þar eru stjórnarhættir ekki undanskildir. Sjávarútvegurinn hefur stigið stór framfaraskref á undanförnum árum. Til dæmis í umhverfis- og loftslagsmálum, þar sem höfðað hefur verið til samfélagslegrar ábyrgðar fyrirtækja. Samtökin gera sambærilega kröfu til félagsmanna sinna um að stunda heiðarlega, gagnsæja og löglega starfshætti.“