Hátt í 60 kindur drápust eftir að fjárflutningabíll valt á Dynjandisheiði um miðjan dag í gær. Lögreglan á Vestfjörðum greinir frá þessu á Facebook. Bíllinn var á suðurleið og valt rétt sunnan afleggjarans til Bíldudals.

Bílstjóra og farþega sakaði ekki í umferðaróhappinu en 60 kindur af þeim 310 sem voru í bílnum drápust eða voru aflífaðar á staðnum. Héraðsdýralækni var tilkynnt um atvikið og rannsakar lögreglan tildrög óhappsins.

„Þetta er ekki nýjasti vegurinn. Þetta er malarvegur og vegkantarnir eru oft mjúkir. Auk þess var slabb og krap á heiðinni“ segir Hlynur Snorrason, yfirlögregluþjónn hjá lögreglunni á Vestfjörðum, í samtali við Fréttablaðið.

Hann segir eigendur hafa aflífað kindurnar sjálfir í stað dýralæknis þar sem biðin hefði verið of löng. „Þetta þurfti að gera hratt annars hefði þetta verið of kvalarfullt fyrir kindurnar. Það var ekkert um annað ræða.“

Hlynur segist ekki muna eftir neinum sambærilegum málum á svæðinu. Slysið hafi verið mikil áfall fyrir eigendur.

Til stendur að laga hluta leiðarinnar, þ.e. um Bíldudalsveg. Vegagerðin hefur skrifað undir samning við Íslenska aðalverktakar og hefjast framkvæmdir í næsta mánuði að sögn Vegagerðarinnar.