Reykjavíkurborg mun hafa sex leikskóla á sínum vegum opna í allt sumar, einn í hverju hverfi.

Þetta er í Bakkaborg í Breiðholti, Drafnarsteinn í Vesturbæ, Engjaborg í Grafarvogi, Langholt í Laugardal/Háaleiti, Maríuborg í Árbæ/Grafarholti og Stakkaborg í Miðborg/Hlíðum.

Sumaropnun leikskóla er tilraunaverkefni sem fór af stað sumarið 2019 til að koma til móts við óskir foreldra um meiri sveigjanleika á orlofstíma. Foreldrar sækja um sumardvöl fyrir barn sitt í leikskóla sem er opinn og verður hægt að sækja um frá og með 5. mars.

Segir í tilkynningu frá borginni að í fyrra hefðu þó aðeins 18 prósent foreldra sótt um að taka sumarleyfi á öðrum tíma en var í þeirra leikskóla. Ástæðan er talin líklega sú að foreldrar höfðu gengið á orlofsdaga sína vegna verkfalla fyrr á árinu og kórónuveirufaraldursins. Samtals nýttu foreldrar 187 barna sér sumaropnunina 2020 eða foreldrar 4 prósent leikskólabarna.

Kostnaður við sumaropnunina í fyrra var 44 milljónir.

Enn fremur segir að í nýlegri viðhorfskönnun meðal foreldra kom fram að 97 prósent foreldra voru mjög eða frekar ánægðir með að einn leikskóli í hverjum borgarhluta væri opinn yfir sumarið líkt og undanfarin tvö ár.