Sexmenningarnir sem voru handteknir vegna Samherjaskjalanna í gær voru leiddir fyrir dómara í morgun. Þetta kemur fram í namibíska dagblaðinu The Namibian. Mál sexmenningana hefur verið frestað til morgundagsins vegna umsóknar um lausn gegn tryggingu. Allir eru þeir grunaðir um spillingu, fjársvik og peningaþvætti í tengslum við Samherjamálið.

Paulus Noa, yfirmaður ACC, spillingarlögreglu Namibíu, sagði í samtali við RÚV í gær að hægt væri að halda mönnunum í fangelsi í tvo sólarhringa. Á morgun kemur því í ljós hvort þeir verða lengur í haldi.

Umræddir sexmenningar eru meðal annars hinir svokölluðu hákarlar Sacky Shanghala, fyrrverandi dómsmálaráðherra Namibíu og James Hatuikulipi, fyrrverandi stjórnarformaður namibísku ríkisútgerðarinnar Fishcor, Bernhardt Esau, fyrrverandi sjávarútvegsráðherra og Tamson 'Fitty' Hatuikulipi, tengdasonur Esau auk þeirra eru þeir Ricardo Gustavo, samstarfsmaður James og Pius 'Taxa' Mwatelulo, sem tengist James fjölskylduböndum ákærðir í málinu.

Sacky og James voru handteknir í gærmorgun á búgarði þeirra en hinir fjórir voru teknir fastir í Windhoek, höfuðborg Namibíu.