Hér á landi hafa 6.578 börn á aldrinum 0 til 16 ára greinst með Covid-19 frá upphafi faraldursins til 2. janúar 2022, þar af eru 3.449 börn á aldrinum 5 til 11 ára.

Þetta kemur fram í svari frá Willum Þór Þórssyni heilbrigðisráðherra við fyrirspurn frá Diljá Mist Einarsdóttur, þingmanni Sjálfstæðisflokksins, um Covid-19 smit barna. Svarið birtist á vef Alþingis í dag.

Frá upphafi faraldurs hafa sex börn yngri en 5 ára verið lögð inn á sjúkrahús vegna Covid-19. Ekkert barn á aldrinum 5 til 16 ára hefur hins vegar verið lagt inn á sjúkrahús.
Tvö börn undir fimm ára aldri hafa þurft á gjörgæslustuðningi að halda vegna smits.

Alls hafa 17 börn fengið rauða merkingu í eftirliti COVID-göngudeildar, sem þýðir mjög alvarleg veikindi sem þarfnast athugunar læknis, þar af fjögur sem voru á aldrinum 5–11 ára. Á sama tíma hafa 308 börn undir 16 ára fengið gula merkingu í eftirliti COVID-göngudeildar sem þýðir versnandi veikindi, þar af 143 sem voru á aldrinum 5 til 11 ára.