Fasteignaverð á höfuðborgarsvæðinu hækkaði um 1 prósent í september. Samkvæmt tölum Þjóðskrár hefur það hækkað um 3 prósent síðastliðna þrjá mánuði og 4 prósent síðastliðna sex mánuði, alls hefur verðið hækkað um 5,6 prósent síðasta árið.

Páll Heiðar Pálsson fasteignasali segir þetta langt umfram spár greiningardeilda stóru bankanna. „Við gætum horft fram á 7 til 8 prósenta hækkun á þessu ári, það var spáð 3 til 4 prósentum,“ segir Páll.

Frá 1. júlí til 1. október hafa selst um 2.516 eignir í fjölbýli og sérbýli, á sama tíma í fyrra seldust 1.995 eignir. Páll segir að markaðurinn gæti ofhitnað og skortur gæti orðið á eignum næstu árin.

„Það eru um 2.100 eignir skráðar til sölu á höfuðborgarsvæðinu, þarf af um 700-800 nýbyggingar sem eru jafnvel þrískráðar. Eins er mikið um að eignir séu enn auglýstar til sölu sem eru seldar með ákveðnum fyrirvörum. Það má því segja að það séu í raun á bilinu 1.400 til 1.500 eignir á markaðnum í dag. Á sama tíma eru um 25.000 notendur að skoða fasteignavef Morgunblaðsins á viku,“ segir Páll. „Ég hef séð svona tölur áður, en síðast þegar ég gerði það þá hækkaði verðið mjög hratt.“