Tveir karlmenn, þeir Deonisy Khlebnikov og Gatis Lagzdins, hafa fengið sekt fyrir að éta hráa íkorna fyrir utan vegan matsölubás í Soho í Lundúnum. Mennirnir tveir gerðu þetta í mótmælaskyni gegn matsölubásnum að því er fram kemur á vef Guardian.

Fullorðnir og börn urðu vitni að athæfinu og báðu viðstaddir mennina um að hætta athæfinu undir eins, sem þeir neituðu að gera. Mennirnir voru í kjölfarið dæmdir fyrir velsæmisbrot og gert að greiða sekt.

Natalie Clines saksóknari segir að mennirnir hafi verið á móti veganisma og að þeir hafi viljað vekja athygli á „hættunni“ sem fylgi því að borða ekki kjöt og hafi þeir því fláð íkornana að hluta og étið þá hráa í mótmælaskyni.

„Með því að velja að gera það fram­an við veg­an mat­arbás og halda viður­styggi­legri hegðun sinni áfram þrátt fyr­ir að hafa verið beðnir um að hætta, meðal annars af for­eldr­um barns sem komst í upp­nám, gat sak­sókn­ari sýnt fram á að þeir ætluðu sér að valda al­menn­ingi óhugnaði,“ segir Clines í samtali við fjölmiðla.

Khlebnikov var dæmdur til að greiða 200 punda sekt og Lagzdins 400 punda sekt.

Gatis Lagzdins er þekktur á Youtube undir notandanafninu Sv3rige þar sem hann hvetur fylgjendur sína til að hafna veganisma.