Eigendur Ásmundarsalar segja að reglur um fjöldatakmarkanir hafi ekki verið brotnar, né reglur um opnunartíma, á sölusýningu í Ásmundarsal á Þorláksmessu. Sýningin „Gleðileg jól“ hafi verið öllum opin þetta kvöld og ekki um einkasamkvæmi að ræða.

Samkoma á sýningunni í Ásmundarsal hefur verið mikið milli tannanna á fólki en greint var frá því á aðfangadag að Bjarni Benediktsson, fjármála- og efnahagsráðherra hafi verið viðstaddur í fjöru­tíu til fimm­tíu manna sam­kvæmi í Ás­mundar­sal á Þorláksmessu. Lög­regla fékk til­kynningu um brot á sam­komu­tak­mörkunum klukkan að verða hálf ellefu á Þorláksmessu og stöðvaði sam­kvæmið, en í tilkynningu frá lögreglunni á höfuðborgarsvæðinu kom fram að ráðherra í ríkisstjórn Íslands hafi verið meðal gesta.

Aðalheiður Magnúsdóttir og Sigurbjörn Þorkelsson, eigendur Ásmundarsalar sendu frá sér tilkynningu vegna atviksins í dag.

„Í ljósi ítrekraðrar umfjöllunar vilja eigendur Ásmundarsalar taka fram að ekki voru brotnar reglur um fjöldatakmarkanir eða opnunartíma sölusýningar. Grímunotkun var hinsvegar ábótavant og því ljóst að mistök voru gerð í að tryggja sóttvarnir. Á þeim mistökum að fylgja ekki eftir grímuskyldu axla eigendur Ásmundarsalar fulla ábyrgð og munu tryggja að þau endurtaki sig ekki," segir í tilkynningunni.

Lögreglan stöðvaði fjörutíu til fimmtíubanna samkomu í Ásmundarsal á Þorláksmessu.
Fréttablaðið/Sigtryggur Ari

Eigendur segja að allt að 60 manns hafi mátt vera í byggingunni umrætt kvöld með tiliti til gildandi sóttvarnaregla. Eigendur telji því ótvítrætt að fjöldi gesta hafi verið undir því viðmiði.

„Á neðri hæð Ásmundarsalar er kaffihús með vínveitingaleyfi þar sem 15 manns mega koma saman og viðbótarrýmið Gryfjan sem allt að 10 manns mega vera í. Á efri hæð er aðalsýningarrými verka þar sem allt að 35 manns mega koma saman. Heildarfjöldi í byggingunni getur því verið allt að 60 manns að uppfylltum sóttvarnarreglum. Á Þorláksmessukvöld var Gryfjan lokuð og var því leyfi fyrir 50 manns í húsinu. Eigendur telja ótvírætt að fjöldi gesta hafi ávallt verið undir því viðmiði."

45 manns komu inn í húsið síðasta klukkutímann

Sölusýningin „Gleðileg jól“ hófst í byrjun desember en brugðið var á það ráð að biðja gesti að skrá sig fyrirfram á sýninguna og mátti hver gestur vera í 30 mínútur í senn og að hámarki 10 manns í aðalsýningarrýminu. Almennar sóttvarnareglur voru rýmkaðar frá og með 10. desember en beðið var með að rýmka reglur Ásmundarsalar til 15. desember.

„Eins og aðrar verslanir umrætt Þorláksmessukvöld mátti Ásmundarsalur hafa opið til klukkan 23:00. Auglýstur opnunartími var hins vegar til 22:00 en hugsunin með því var sú að viðskiptavinir hefðu nægt svigrúm til að ljúka við listaverkakaup sín og jafnframt að hægt yrði að tæma húsið ekki seinna en kl. 23:00. Á Þorláksmessu var aðsóknin jöfn og róleg allan daginn. Veitingasölu á kaffihúsinu var hætt á hefðbundnum tíma klukkan 17:00, en rými kaffihússins er hluti af sölu- og sýningarrýminu og var það því áfram opið sýningargestum. Alls komu um 45 manns inn í húsið síðasta klukkutímann fyrir lokun klukkan 23:00 og stoppuðu sumir stutt við, eins og tíðkast á Þorláksmessu. Heildarfjöldinn fór aldrei yfir 50 og var því innan þeirra marka sem reglur mæla fyrir um. Kemur það heim og saman við talningu lögreglu. Þegar lögreglu bar að garði var starfsfólk að loka sýningunni og undirbúa að tæma húsið."

Að endingu segja eigendur safnsins harma að þessi mistök hafi átt sér stað. „Tryggt verður til framtíðar að gestir hússins geti treyst því að sóttvarnarreglum verði fylgt í einu og öllu."