Katrín Jakobsdóttir forsætisráðherra hafnar því sem fram kemur í Klaustursupptökunum, um að hún hafi verið upplýst um skipan Geirs H. Haarde í stöðu sendiherra í Washington. Segir hún Gunnar Braga Sveinsson hins vegar hafa upplýst sig um skipun Árna Þórs Sigurðssonar, fyrrum þingmanns Vinstri grænna, sem sendiherra, en segir hann ekki hafa minnst á Geir í því samhengi.

Skipun Árna Þórs og Geirs komst í hámæli eftir að Gunnar Bragi kvaðst hafa skipað Árna í þeim tilgangi að draga athygli frá skipun Geirs. 

Ummælin má heyra í Klaustursupptökunum og sagðist Gunnar Bragi í kjölfarið eiga inni hjá Sjálfstæðisflokknum vegna málsins. Katrín ritar um málið á Facebook-síðu sína og segist Gunnar Bragi hafa dregið nafn sitt inn í umræðuna, en eðli samtalsins hafa verið þannig að hún byggist ekki við að þurfa að svara fyrir nokkuð. 

„Rétt er að halda því til haga að Gunnar Bragi hefur lýst því yfir í kjölfarið að þarna hafi ekki verið rétt greint frá málsatvikum en þeirri spurningu hefur verið hreyft á opinberum vettvangi hver mín aðkoma og afstaða hafi verið til þessa máls.“

Þá segir hún að rangt sé hjá Gunnari Braga að Katrín hafi ekki gagnrýnt skipan Geirs, þar sem hún gerði það á sínum tíma opinberlega og auðvelt sé að finna á veraldarvefnum. Taldi hún sérstakt að hann hefði verið skipaður sendiherra á vegum íslenskra stjónvalda sem hann átti þá í málaferlum við.

„Það er líka rangt að ég hafi verið upplýst um skipan Geirs H. Haarde fyrirfram. Gunnar Bragi Sveinsson upplýsti mig hins vegar um skipan Árna Þórs Sigurðssonar sem sendiherra en minntist ekkert á Geir í því samhengi. Gunnar Bragi hafði þá þegar tekið ákvörðun um skipan Árna Þórs en hann var þá þingmaður Vinstri-grænna. Ég kom ekki að þeirri ákvörðun og sóttist ekki eftir þessu starfi fyrir hönd Árna Þórs Sigurðssonar. Ég taldi að ákvörðun þáverandi utanríkisráðherra að upplýsa mig um ákvörðun sína hefði fyrst og fremst verið almenn kurteisi og mér til upplýsingar vegna stöðu Árna Þórs sem starfandi þingmanns í þingflokki Vinstri grænna. Skipan þessara sendiherra var á ábyrgð utanríkisráðherra eins og lög gera ráð fyrir.“