„Virðulegi forseti. Við erum jafn forviða, við varaþingmenn sem nú sitjum á þingi, yfir vinnubrögðum hér,“ sagði Friðjón R. Friðjónsson, varaþingmaður Sjálfstæðisflokksins, í umræðum um störf þingsins á Alþingi í dag.
Skýrsla Ríkisendurskoðunar um söluna á Íslandsbanka var nokkuð áberandi í umræðunum og þá einkum sá þáttur er sneri að leka skýrslunnar til fjölmiðla síðastliðinn sunnudag. Ríkisendurskoðandi afhenti stjórnskipunar- og eftirlitsnefnd skýrsluna svo nefndarmenn gætu kynnt sér efni hennar áður en hún yrði birt.
„Trúnaðurinn virðist þó aðeins hafa haldið u.þ.b. eins lengi og það tók einhvern nefndarmann að ýta á áframsenda í tölvupóstforriti sínu. Komið hefur fram að ríkisendurskoðandi er ekki í vafa um hvað gerst hafi. Hann telur, með leyfi forseta, „nokkuð öruggt að henni hafi verið lekið af nefndarmanni stjórnskipunar- og eftirlitsnefndar“ og bendir á að Ríkisendurskoðun hafi unnið við skýrsluna mánuðum saman án þess að hún rataði til fjölmiðla, en um leið og skýrslan barst nefndinni var hún komin í hendur fjölmiðla.“
Friðjón segir það blasa við að Alþingi muni gjalda fyrir trúnaðarbrestinn. Afleiðingarnar verði þær að fólk sem á erindi við nefndir þingsins getur ekki treyst þeim.
„Fyrir 30 árum eða þar um bil líkti þingmaður og ráðherra starfsháttum á Alþingi við gagnfræðaskóla og hlaut bágt fyrir. Ég held að flestir þeir sem ég var með í Réttó á sínum tíma hafi haldið trúnað lengur og betur en þessi þingmaður stjórnskipunar- og eftirlitsnefndar sem var skjótari en skugginn að skjóta skýrslunni upp í Efstaleiti. Ég held að það blasi við, virðulegi forseti, að Alþingi setur niður við þennan trúnaðarbrest og forseti hlýtur að bregðast við málinu,“ sagði Friðjón.
