Ragnhildur Alda María Vilhjálmsdóttir, nýr borgarfulltrúi Sjálfstæðisflokksins í Reykjavík, segir útspil Viðreisnar og bandalags þeirra við Pírata og Samfylkingu andlýðræðislegt. Sjálfstæðismenn geti vel unnið í meirihluta þrátt fyrir ólíkar skoðanir.
Einar Þorsteinsson, oddviti Framsóknar, sagði í samtali við blaðið í gær að Sjálfstæðisflokkurinn sé nú í reynd útilokaður úr meirihlutasamstarfi, eftir útspil Þórdísar Lóu Þórhallsdóttur, oddvita Viðreisnar. Þórdís lýsti því yfir í gær að Viðreisn myndi ekki brjóta raðir bandalags með Samfylkingu og Pírötum en þeir síðastnefndu hafa útilokað samstarf við Sjálfstæðisflokkinn í borginni.
Ekki náðist í Hildi Björnsdóttur, oddvita flokksins vegna málsins. Ragnhildur Alda, sem skipar 2. sæti á lista Sjálfstæðisflokksins í borginni, segir aðspurð að útspil Viðreisnar komi sér spánskt fyrir sjónir.
„Vilji kjósenda var mjög skýr í þessum kosningum. Það er bara þannig. Þú getur hugsað þetta eins og hún gerir, sem er að halda fast í eitthvað bandalag sem var í raun og veru hafnað, eða þá að muna að þitt hlutverk sem kjörinn fulltrúi er ekki að vera bara í framboði fyrir fólkið sem þú vilt meina að kjósi þig heldur alla borgarbúa,“ segir Ragnhildur.
„Auðvitað býð ég mig fram fyrir mína kjósendur, en ég þarf að starfa fyrir alla. Þá tel ég fyrir vikið svolítið andlýðræðislegt að vera í þessari útilokunarpólitík, því sama hvernig menn vilja reyna að réttlæta það þá snýst þetta um heildina en ekki bara hinn og þennan.“
Ragnhildur rifjar upp þegar faðir hennar, Vilhjálmur Egilsson, sat á þingi. „Ég spurði hann út í þetta: „Getið þið unnið með þessum og hinum?“ og hann sagði bara: „Alda, þetta er einfaldlega svoleiðis að pólitík er alltaf ákveðin málamiðlun á milli stríðandi fylkinga, þannig náum við besta gullna meðalveginum. Þannig mitt hlutverk er að reyna að semja um okkar mikilvægustu mál og svo vinnum við með öllum.“ Það er kannski munurinn á minni hugmyndafræði og hennar, ég er að starfa fyrir alla,“ segir Ragnhildur og vísar þar til Þórdísar Lóu.
Segir um að ræða eftiráskýringu Þórdísar Lóu
Þórdís Lóa sagði í samtali við blaðið í gær að 60 prósent kjósenda hefðu sett atkvæði sitt á flokka sem hefðu verið skýrir í stuðningi sínum við samgöngusáttmála og borgarlínu. Sjálfstæðisflokkur og Flokkur fólksins hefðu ekki verið skýrir í sínum svörum.
Sjálf sagðist Ragnhildur Alda í sinni prófkjörsbaráttu meðal annars vera á móti borgarlínu. Aðspurð hvort að það bitni nú á Sjálfstæðisflokknum í meirihlutaviðræðum hve ólíkar skoðanir sé að finna meðal borgarfulltrúa þeirra segist Ragnhildur ekki telja svo vera.
„Ég held ekki. Ég held þetta sé eftiráskýring Lóu, til að geta verið með útilokunarpólitík. Staðreyndin er sú að Sjálfstæðisflokkurinn hefur alltaf verið breiðfylking af ástæðu, við lifum eftir þeirri hugmyndafræði að það sé mikilvægt að taka umræðuna og að í krafti fjöldans náirðu bestu niðurstöðu,“ segir Ragnhildur.
„Þar af leiðandi erum við ekki á þeirri línu að gera ráð fyrir því að maður viti alltaf best. Það er ákveðin skekkja að halda að maður viti allt best og þess vegna erum við opin fyrir því að það séu stríðandi skoðanir sem er þá bara tekin umræða um á landsfundum og flokkstjórnarfundum og svo vinnum við bara saman.“
Ragnhildur segir Sjálfstæðismenn því ekki tengja við það hvernig Þórdís Lóa leggi upp hlutina í meirihlutaviðræðum. „Því að okkar skoðun er sú að það sé allt í lagi að vera ekki alveg fullkomlega sammála um smáatriðin. Þetta snýst um að ná árangri en ekki völdum.“
