Segir það rangt að farþegum hafi verið vísað úr vagninum

Jóhannes Svavar Rúnars­son, fram­kvæmda­stjóri Strætó, segir það rangt að far­þegum sem voru á leið 18 úr Grafar­holti í gær hafi verið vísað úr vagninum og út í ó­veðrið sem gekk yfir. Búið sé að tala við við­komandi vagn­stjóra sem hafi tekið fyrir að nokkrum manni hafi verið vísað út.

Vísir greindi frá því fyrr í dag að far­þegum sem voru á ferð með leið 18 í átt að Spönginni í Grafar­vogi í gær­kvöldi hafi verið vísað úr vagninum við Ingunnar­skóla í Grafar­holti vegna ó­færðar í Úlfarsár­dal. Í fréttinni kemur fram að vagn­stjóri hafi ekki boðið far­þegum að fara með vagninum í skjól og þeir því þurft að fá að­stoð björgunar­sveita til að komast leiða sinna.

„Við erum búin að tala við vagn­stjórann og það var engum vísað úr vagninum. Það var til­kynnt bæði á heima­síðu okkar og í Klappinu að leið 18 gæti ekki keyrt í Úlfarsár­dal vegna færðar og ó­veðurs, þannig að leiðin var stytt um Jóns­geisla í Grafar­holti. Þegar þangað var komið segir vagnstjóri að hann hafi sagt far­þegum að lengra kæmist hann ekki vegna færðar,“ segir Jóhannes.

Málið hafi verið skoðað sér­stak­lega vegna barns sem hafi verið þarna á ferð.

„Vagn­stjórinn segir að stúlkan hafi óskað eftir því að fá að fara út. Hún hafi verið með síma með sér og taldi vagn­stjórinn að hún ætlaði að hringja í for­eldra sína og láta sækja sig,“ segir Jóhannes.

Að­spurður segir Jóhannes að öllum farþegum hafi staðið til boða að halda á­fram með vagninum, hafi þeir kosið svo.

„Það var öllum vel­komið að vera með okkur á­fram ef þeir hefðu viljað, jafn­vel hring eftir hring. En það var engum vísað úr vagninum,“ á­réttir Jóhannes.

Í sam­tali við Vísi fyrr í dag sagði Jóhannes að það kæmi honum á ó­vart hvað fólk væri mikið á ferðinni þrátt fyrir veður­við­varanir og væri hugsi yfir því hversu lítið fólk fylgist með við­vörunum. Spurður nánar út í þetta segir Jóhannes að hann hefði meint að hann hafi verið hugsi yfir börnum sem séu á ferðinni við slíkar veður­að­stæður.

„Maður hefur auð­vitað skilning á því að full­orðnir telji sig ráða við að­stæður og séu því á ferðinni, en það er kannski annað með ung börn,“ segir hann.

Jóhannes segir að ekki hafi komið til greina að fella niður akstur vegna slæmrar veður­spá. Allt of margir treysti á þennan ferða­máta.

„Við höfum verið mjög tregir við að hætta. Ef við höfum hætt akstri, sem hefur nú komið fyrir stundum, höfum við fengið yfir okkur fúk­yrða­flaum frá far­þegum okkar sem treysta á okkur, sem eru fjölmargir. Það væri þá ekki nema að það sé komið á rautt stig og Almannavarnir eru að vara við því að fólk sé á ferðinni,“ segir Jóhannes.