Ol­ena Selenska, for­seta­frú Úkraínu, segir níu ára son þeirra hjóna þrá að verða her­maður, þetta komi einungis til vegna stríðsins í Úkraínu. Hún segir son sinn hafa misst á­hugann á þeim á­huga­málum sem hann hafði fyrir stríðið. Hún greinir frá þessu í við­tali við NBC News.

„Fyrir stríðið fór sonur minn á þjóð­dansa­æfingar. Hann spilaði á píanóið. Hann lærði ensku. Hann auð­vitað sótti í­þróttir,“ segir Selenska. Hún segist ekki geta fengið son sinn til þessa gömlu á­huga­mála þar sem hann hafi einungis á­huga á hernaði núna.

Nancy Pelosi, forseti fulltrúadeildar Bandaríkjaþings, sýndi Selensku um þingsalinn í gær.
Fréttablaðið/Getty

Selenska mætti fyrir banda­ríska þingið í gær þar sem hún óskaði eftir fleiri vopnum til að að­stoða við bar­áttu Úkraínu­manna við Rússa. Hún var send til Banda­ríkjanna af eigin­manni sínum, Volodimír Selenskíj sem hefur ekki yfir­gefið Úkraínu frá upp­hafi stríðsins.

Þegar hún á­varpaði Banda­ríkja­þing lýsti hún þeim ótta og hættu sem Úkraínu­menn lifa við í dag. Hún sagði þá börn vilja komast til baka í hvers­dags­leikann.

„Það er allt sem ég vil, að sonur minn fái barn­æsku sína til baka og að hann njóti lífsins til hins fyllsta,“ sagði hún.

Hungurleikar Rússa

Selenska sagði stríðið, sem er á sínum fimmta mánuði, vera hungurleika Rússa. Hún sagði þá enn fremur að vopnasendingar frá Bandaríkjunum myndu tryggja „sameiginlegan sigur.“

„Við endum niðurbrotin þegar heimi okkar er rústað af stríði. Tugir þúsunda slíkra heima hafa rústast í Úkraínu,“ sagði Selenska en ræða hennar taldi fimmtán mínútur.

„Svarið við árásum Rússa er héna í Washington DC. Hjálpið okkur að stoppa þennan hrylling gegn Úkraínumönnum og þetta verður sameiginlegur sigur okkar,“ sagði hún.