Breki Karlsson, formaður Neytendasamtakanna, segir það algerlega ótækt að almenningur viti ekki hvort hann er að kaupa sýktan eldisfisk eða ekki í matvöruverslunum.

Fréttablaðið greindi frá því í gærdag að sýktur eldislax fari á neytendamarkað í krafti umsagnar dýralækna Matvælastofnunar sem segja að veirusýkingar í fiski berist ekki í fólk.

„Auðvitað eiga allir neytendur heimtingu á að vita hvort þeir eru að borða sýktan lax eða ekki, ella liggur allur lax undir grun,“ segir Breki og minnir á að rétturinn til upplýsingar sé meðal meginréttinda neytenda, sem John F. Kennedy lagði grunninn að í ræðu árið 1953.

„Krafan um matvælaöryggi er líka ein af grunnkröfum neytendaréttar,“ heldur Breki áfram, en enginn vafi eigi að leika á um skaðsemi matvæla. „Við höfum líka kvartað til Neytendastofu vegna sumra þessara sjókvíaeldisfyrirtækja sem skreyta sig með orðunum „vistvænt sjóeldi“ en það er akkúrat ekkert vistvænt við það,“ segir Breki og telur fyrirtækin „skreyta sig með grænþvotti“.

Krafa Neytendasamtakanna í þessum efnum er í anda kæru sem Matvælastofnun barst í síðasta mánuði frá Íslenska náttúruverndarsjóðnum, en forkólfar hans krefjast þess að stofnunin upplýsi í svokölluðu „Mælaborði fiskeldis“ um afföll eldisfiska í sjókvíum. Að mati þeirra er það skylda stjórnvalda að veita almenningi aðgang að gögnum um afdrif þessa matfisks.

Laxeldisstöðvar hafa sprottið upp víða á Íslandi og Noregi undanfarin ár.
fréttablaðið/Getty