Donald Trump Bandaríkjaforseti kennir Parísarsamkomulaginu um vaxandi ólgu í Frakklandi. Mótmælt hefur verið á götum Parísar og annarra borga í Frakklandi hvern laugardag frá því 17. nóvember. Í upphafi gramdist mótmælendum fyrirhuguð hækkun eldsneytisskatts en nú hafa ýmis hugðarefni bæst á eld mótmælanna. 

Segir Trump mótmælin vera sönnun þess að það hafi verið góð ákvörðun hjá Bandaríkjastjórn að draga stuðning Bandaríkjanna við samkomulagið til baka, en það gerði forsetinn í fyrra.

„Parísarsamkomulagið er ekki að virka svo vel fyrir París,“ skrifaði Donald Trump á Twitter-síðu sína i morgun. „Mótmæli og óeirðir út um allt Frakkland. Fólk vill ekki borgar háar upphæðir, mest til þriðja heims ríkja(sem eru rekin á vafasaman máta), til þess að mögulega hjálpa umhverfinu,“ ritaði forsetinn og bætir við: „Hrópa: Við viljum Trump.“

Tíst forsetann kemur í kjölfar fjöldahandtöku í París, en meira en 200 mótmælendur voru handteknir á götum borgarinnar í dag. Lögregla í París hefur beitt táragasi á mótmælendur.