Einn land­eig­enda Dranga­víkur, Guð­rún Anna Gunnars­dóttir, hefur sent Úr­skurðar­nefndar um um­hverfis- og auð­linda­mál bréf þar sem hún gerir form­lega at­huga­semd við kæru meiri­hluta land­eig­enda til sömu nefndar. Þar var kært bæði deili­­skipu­lag og fram­­kvæmda­­leyfi VesturVerks fyr­ir fyrsta á­fanga Hvalár­­virkj­un­ar. Greint var fyrst frá á bb.is

Guð­rún Anna dregur, í bréfi sínu, í efa kort sem þau styðjast við sem teiknað var af land­fræðingnum Sigur­geiri Skúla­syni og er byggt á landa­merkjum frá 1890. Hún segir að jarða­mörk Dranga, Dranga­víkur og Engja­ness hafi verið ó­um­deild um aldir og að kort Sigur­geirs sé ekki byggt á ríkjandi hefðum til fjalla sem séu vatna­skil.

Hún segir kortið vís­vitandi sett fram á fölskum for­sendum og einungis sett fram til að valda öðrum skaða. Þá gerir hún einnig at­huga­semdir við það að Sif Kon­ráðs­dóttir hafi beðið Sigur­geir að teikna kortið, en Sif var þar til í nóvember á síðasta ári að­stoðar­kona Guð­mundar Inga Guð­brands­sonar, um­hverfis- og auð­lindar­ráð­herra.

Landamerkin sem VesturVerk og Árneshreppur studdust við.

Fer eftir mörgum heimildum

Sigur­geir Skúla­son, land­fræðingur, stað­festi í sam­tali við Frétta­blaðið í kvöld að það hafi verið Sif sem óskaði þess að hann teiknaði kortið. Hann segir að þegar hann teikni slík kort þá fari hann á­vallt eftir mörgum heimildum og skoði marga hugsan­lega mögu­leika til að komast að réttri niður­stöður.

„Ég teiknaði kortið sam­kvæmt landa­bréfa­merkjunum gömlu. Það er sú heimild sem ég nota. Ég er fenginn inn sem sér­fræðingur og teikna þetta upp eftir bréfum sem eru gerð í kringum 1885 sir­ca. Þa voru gerð landa­merkja­bréf af öllum jörðum á landinu, það var skylda sam­kvæmt lögum. Það sem ég hef þar til að vinna eftir eru landa­merki Dranga, landa­merki Dranga­víkur, landa­merki Engja­ness og landa­merki Ó­feigs­fjarðar,“ segir Sigur­geir.

Hann segir að lé­legasta landa­merkið hafi verið í kringum svæði Dranga­víkur og því hafi hann í raun þurft að draga mörk jarðanna í kring.

„Ég þurfti að draga mörk hinna jarðanna eins og þau eru í bréfunum. Það er raun­veru­lega þannig sem ég dreg Ó­feigs­fjarðar­línuna, Engja­nes­línuna og Dranga­víkur eins og hún nær og svo Dranga. Ég get ekki búið til línur sem að ég hef ekki heimildir fyrir,“ segir Sigur­geir.

Þinglýst landamerki sem Sigurgeir styðst við.

„Enginn sem stjórnar því hvað ég teikna“

Hann segir að ekkert nema þær heimildir sem hann finni stjórni því hvað hann teiknar.

„Þegar maður er að gera svona kort þá skoðar maður alla mögu­leika sem koma upp í bréfunum. Það er það sem fyrst og fremst málið. Ég skoða fleiri en einn mögu­leika, hvort það geti eitt­hvað annað verið, en svo endan­leg niður­staða er sú sem birtist þarna af því sem að ég teikna. En það er ein­göngu sam­kvæmt þeim heimildum sem að ég fæ úr þessum bréfum og það er enginn sem stjórnar því hvað ég teikna annað en þessar heimildir,“ segir Sigur­geir.

Sigur­geir segist ekki kannast við Guð­rúnu Önnu Gunnars­dóttir, en segir að annar aðili hafi haft sam­band við hann frá Stykkis­hólmi.