Guðmundur Ingi Guðbrandsson Félags- og vinnumarkaðsráðherra segir dómsmálaráðherra hafa farið með rangt mál varðandi samstöðu ríkisstjórnarinnar í málefnum flóttafólks. Þetta kemur fram í viðtali við Guðmund í tíufréttum RÚV, en þar vísar hann til ummæla Jóns Gunnarssonar, dómsmálaráðherra í Kastljósi.

Málefni flóttafólks, og þá sérstaklega brottvísanir hafa verið til mikillar umræðu síðustu daga. Jón Gunnarsson dómsmálaráðherra sagði í kvöld að það væri algjör samstaða innan ríkisstjórnarinnar um þessi mál. Guðmundur var spurður út í það og svaraði neitandi.

„Nei það er ekki rétt og ég gerði mjög alvarlegar athugasemdir við þá vegferð sem ráðherrann er á á ríkisstjórnarfundi í morgun.“ sagði Guðmundur sem heldur því fram að hann hafi bent Jóni á að það þyrfti að skoða mál margra flóttamanna betur.

Þá hélt hann því jafnframt fram að fleiri ráðherrar hafi gert alvarlegar athugasemdir við störf Jóns. Hann vildi þó ekki gefa upp hvaða ráðherrar það væru. „Þau verða sjálf að gefa það upp.“

Spurður frekar út í hvað honum þætti um ummæli dómsmálaráðherra sagði Guðmundur: „Í mínum huga er þetta bara rangt. Það er bara þannig. Ég vona bara að við leysum úr þessu máli. Ég fylgi bara mannúðlegri útlendingastefnu VG. Að mínu viti þurfum við að taka þetta mál til sérstakrar skoðunnar,“

Þá sagðist hann ekki ánægður með störf Jóns í málaflokknum. „Nei ég get ekki sagt að ég sé það. Ég held að það sé ljóst af mínum orðum.“ Þó sagðist hann hafa fulla trúa á því að hægt væri að ná einingu innan ríkisstjórnarinnar í málinu.