Róbert Smári Gunnars­son segir frétta­flutning DV og Bylgjunnar, um að faðir hans, Gunnar Bragi Sveins­son, þing­maður Mið­flokksins, hafi verið drukkinn á sýningu Borgar­leik­hússins um El­ly Vil­hjálms­dóttur, vera kol­rangan. Í færslu, sem Róbert gaf Frétta­blaðinu leyfi til að birta, spyr hann hversu mikið sé hægt að leggja á fjöl­skyldu þing­mannsins. 

Í há­degis­fréttum Bylgjunnar er það haft eftir við­mælendum að Gunnar Bragi, sem er meðal þeirra þing­manna sem koma fyrir á Klausturs­upp­tökunum, hafi verið drukkinn og kallað fram í á sýningunni um söng­konuna dáðu föstudaginn 18. janúar. Gunnar Bragi lýsti því nýverið yfir að hann hafi ekki bragðað áfengi frá því að Klaustursmálið kom upp.

Róbert segist sjálfur hafa verið  með föður sínum á sýningunni, auk Sunnu Gunnars Mar­teins­dóttur, kærustu Gunnars Braga, og segir hann þetta ein­fald­lega ekki vera rétt.

„Pabbi bragðaði ekki á­fengi fyrir sýningu, né á sýningu og ekki eftir hana. Sýningin var góð, við skemmtum okkur vel, hann greip ekki fram í og var blá­edrú, allir voru til fyrir­myndar,“ skrifar Róbert í færslunni. 

Hann spyr hvort botninum sé náð og hversu lágt sé hægt að leggjast með svona fréttaskrifum. „Skrifa þetta með tárin í augunum, sár og reiður, að svona skuli nokkur skrifa án vísunar til sann­leikans og að leggja þetta á okkur, okkur sem vitum að þetta er hauga­lygi.“

Færsluna má lesa hér fyrir neðan en Róbert Smári gaf Fréttablaðinu leyfi til birtingar hennar.

Nú er mælirinn fullur. Hvenær er komið nóg? 
Ég var á þessari sýningu með pabba og Sunnu þann 18. janúar. Pabbi bragðaði ekki áfengi fyrir sýningu, né á sýningu og ekki eftir hana.
Sýningin var góð, við skemmtun okkur vel, hann greip ekki fram í og var bláedrú, allir voru til fyrirmyndar. Og öll vorum við sammála að um einhverja flottustu sýningu sem við höfum séð væri að ræða.
Hversu lágt er hætt að leggjast? Hvenær er botninum náð? Hvað fær ,,blaðamann” til þess að halda þ
essu fram og búa svona til? Hvað ætla fjölmiðlar að leggja mikið á fjölskyldur stjórnmálamanna?!
Skrifa þetta með tárin í augunum, sár og reiður, að svona skuli nokkur skrifa án vísunar til sannleikans og að leggja þetta á okkur, okkur sem vitum að þetta er haugalygi.
Andskotans endemis vitleysa.

ATH. Fjölmiðlar mega ekki búa til frétt úr þessum pósti mínum nema með leyfi, og bið ég þá um að virða það. Þetta er mín síða.