Segir engan hafa upp­­­­­lýst sig um reglurnar fyrr en komið var á hótelið

Branka Aleksandars­dóttir vissi ekki hvaðan á sig stóð veðrið þegar rútan, sem henni og þrettán ára dóttur hennar hafði verið vísað í í Leifs­stöð, nam staðar í Þórunnar­túni en ekki á BSÍ eins og hún hafði gert ráð fyrir. Þar var þeim vísað inn á nýtt sótt­kvíar­hótel og til­kynnt að þær þyrftu að dvelja þar í fimm daga sótt­kví. Frá því að þær lentu á Kefla­víkur­flug­velli og þar til rútan kom með þær á sótt­kvíar­hótelið hafði enginn sagt þeim að þær þyrftu að taka sóttkvína út þar. Branka hefur krafist þess fyrir dómi að fá að taka sóttkvína út á heimili sínu og má búast við að héraðs­dómur kveði upp dóm sinn á morgun.

„Það var enginn að segja okkur neitt og við vissum ekkert,“ segir Branka í sam­tali við Frétta­blaðið. Þær mægður fóru út til Serbíu þann 27. mars til að vera við­staddar jarðar­för móður hennar. Þá höfðu nú­verandi reglur ekki tekið gildi, sem skikka alla sem koma til landsins frá rauðum eða gráum löndum til að taka sótt­kví sína út á sótt­kvíar­hótelinu.

Erfiðast fyrir þrettán ára dótturina

„Þegar við lentum í Kefla­vík var allt orðið öðru­vísi á flug­vellinum en þegar við fórum út. Við fórum í PCR próf og síðan í vega­bréfa­eftir­litið þar sem verðirnir settu rauðan pappír í vega­bréfið okkar og sögðu okkur að sýna lög­reglunni. Ég var svo­lítið hissa á því að ég þyrfti að tala við lög­regluna,“ segir Branka. „Við fórum svo að út­ganginum og þá tekur við okkur leið girt af með böndum og lög­regla og starfs­menn klæddir Co­vid-búnaði sem vísa okkur beint upp í rútu.“

Hún hafi þá ein­fald­lega gert ráð fyrir að rútan færi með þær á BSÍ, því hún vissi ekki af nýju reglunum sem höfðu þá tekið gildi sama dag og þær lentu á landinu. Hún hafi ekki fylgst náið með þeim málum í fréttum síðustu daga enda upp­tekin við að syrgja og jarða móður sína. „Þetta hafa verið virki­lega erfiðir dagar.“

„Við vissum alveg að við þyrftum að fara í sótt­kví og vorum undir­búnar fyrir það en við ætluðum bara að vera heima þar sem við búum einar,“ segir Branka. Hún segir að staðan sé erfiðust fyrir dóttur sína, sem er þrettán ára gömul. Þær séu illa búnar, enda höfðu þær að­eins pakkað léttum klæðnaði fyrir fimm daga ferð í Serbíu.

Þrjú neikvæð próf á einni viku

„Ég skil bara ekki hvers vegna við megum ekki fara heim,“ segir hún þá. „Við erum búnar að fá nei­kvætt úr prófi.“ Og ekki bara einu prófi, heldur þremur á síðustu vikunni. Þær þurftu fyrst að fara í sýna­töku hér heima á Ís­landi áður en þær fóru til Serbíu, þann 27. mars. Síðan urðu þær að fara í aðra sýna­töku í Serbíu fyrir heim­ferðina og svo aftur í sýna­töku á Kefla­víkur­flug­velli. Öll sýnin hafa komið út nei­kvæð.

„Þegar við fengum nei­kvætt úr sýna­tökunni í Kefla­vík hringdi ég í Rauða krossinn og bað um leyfi til að fara heim en nei við fáum það ekki. Svo at­hugaði ég hvort við mættum fá okkur ferskt loft eða fara eitt­hvað út en við megum það ekki heldur,“ segir hún. „Okkur líður hræði­lega svona inni­lokuðum og að­stæðurnar hérna eru ekki boð­legar.“

Hálffrosinn lax í matinn

Hún segir matinn til dæmis ein­stak­lega lé­legan á hótelinu. „Þetta er búið að vera hálf­f­rosið mest allt sem við höfum fengið. Við vorum að enda við að skila hérna ó­ætum hálf­f­rosnum Laxi aftur fyrir utan dyrnar hjá okkur.“

Hún vonast til að héraðs­dómur verði við beiðni hennar um að vera sleppt af hótelinu. Fleiri en hún hafa sóst eftir því að dómurinn taki upp mál sín. Héraðs­dómur ætti að kveða upp úr­skurð í málunum á morgun.