Einar Hermannsson hefur sagt af sér sem formaður SÁÁ. Þetta kemur fram í tilkynningu frá samtökunum. Hann gaf frá sér yfirlýsingu um málið og segist ekki ætla tjá sig frekar um það.

Hann segir ástæðuna vera að hann hafi fyrir nokkrum árum svarað auglýsingu á netinu þar sem í boðið var upp á kynlíf gegn greiðslu. Hann segir þá hegðun vera ófyrirgefanlega.

Þá segist Einar að hafa talið að þau samskipti væru ekki lengur til staðar, og að þau myndu ekki hafa áhrif á starf hans innan SÁÁ. Hann telur að þetta varpi rýrð á samtökin og segir því af sér.

Þá segist hann iðrast gjörða sinna sérstaklega þar sem þetta valdi fjölskyldu hans sársauka, og biður alla sem málið varða afsökunar.

Yfirlýsing hans er eftirfarandi:

„Fyrir nokkrum árum svaraði ég auglýsingu á netinu þar sem í boði var kynlíf gegn greiðslu. Sú hegðun er ófyrirgefanleg en ég taldi mér ranglega trú um að þau samskipti væru grafin og gleymd og þau hafa ekki haft áhrif á störf mín fyrir SÁÁ. Ljóst er hins vegar að umræða um þetta mál er einungis til þess fallin að varpa rýrð á SÁÁ ef ég sit þar áfram sem formaður.

Ég iðrast að hafa farið þessa leið og að hafa valdið fjölskyldu minni sársauka vegna hegðunar minnar. Bið ég alla þá sem málið varðar afsökunar á framferði mínu.“