Björn Leví Gunnarsson, þingmaður Pírata, gefur lítið fyrir afsakanir skrifstofu Alþingis á endurgreiðslu aksturskostnaðar til Ásmundar Friðrikssonar, þingmanns Sjálfstæðisflokksins. Björn bregst við tilkynningu frá skrifstofu Alþingis sem birtist á vef þingsins fyrr í vikunni á Facebook-síðu sinni.

Tilefni færslu Björns er tilkynning sem skrifstofa Alþingis birti á Facebook. Í tilkynningunni segir að skrifstofa Alþingis hafi engin gögn sem benda til þess að rangt hafi verið haft við og röngum eða tilhæfulausum reikningum verið skilað inn til endurgreiðslu af aksturskostnaði. Tilefni tilkynningarinnar var aftur á móti umræða á þingfundi á þriðjudaginn síðasta, þar sem Björn hélt því fram í ræðustól að rökstuddur grunur væri um að Ásmundur hefði dregið að sér fé.

Ummæli Björns má líklegast skilja sem mótmæli við niðurstöðu siðanefndar Alþingis, þess efnis að flokkssystir Björns, Þórhildur Sunna Ævarsdóttir þingkona, hefði brotið siðareglur þingmanna þegar hún sagði í sjónvarpsþættinum Silfrinu á RÚV að rökstuddur grunur væri uppi um að Ásmundur hefði dregið að sér fé.

Sakar ekki skrifstofuna um að greiða tilhæfulausa reikninga viljandi

Björn gerir eins og áður segir téða tilkynningu skrifstofu Alþingis að umfjöllunarefni sínu. „Mig langar til þess að fara yfir þessa yfirlýsingu í smáatriðum,“ skrifar Björn. „Fyrst: "Skrifstofan hefur engin gögn sem benda til þess að rangt hafi verið haft við og röngum eða tilhæfulausum reikningum verið skilað inn til endurgreiðslu."

Nei, auðvitað ekki. Það myndi benda til þess að skrifstofan greiði viljandi tilhæfulausa reikninga. Það er enginn að halda því fram,“ skrifar hann áfram.

Reikningar ekki sjáanlega tilhæfulausir við fyrstu sýn

Næst vitnar Björn í málsgrein úr tilkynningu skrifstofunnar þar sem segir að Ásmundur hafi sjálfur endurgreitt akstursgreiðslur sem hann þáði fyrir akstur þegar hann var í þáttagerð fyrir sjónvarpsstöðina ÍNN. Segir þar að Ásmundur hefði viðurkennt að það væru mistök að leggja inn beiðni um endurgreiðslu fyrir þann akstur. „Þarna er einmitt dæmi um tilhæfulausa reikninga sem ekki var sjáanlegt að væru tilhæfulausir fyrr en Ásmundur var spurður um hvort hann hafi fengið endurgreitt fyrir þessar ferðir, sem hann neitaði fyrst í Kastljósi en játaði svo eftir viðtalið.

Hann neitaði af því að hann vissi væntanlega að það var ekki rétt að fá endurgreiðslu vegna þessara reikninga. Játaði svo þegar hann fattaði að hann myndi ekki komast upp með þessar endurgreiðslur. Ég samþykki því ekki "eigin frumkvæði" athugasemdina í þessu,“ skrifar Björn, og heldur áfram.

„Er þetta eini tilhæfulausi reikningurinn? Jah, það eru þessir með prófkjörin væntanlega. Þeir líta samt eðlilega út í augum skrifstofunnar, eru semsagt ekki merktir með tilefninu "prófkjör".

Ég veit ekki hvaða tilefni er skráð er það er augljóslega tilefni sem passar við endurgreiðslureglur. Auðvitað finnur skrifstofan því ekki tilhæfulausa reikninga sem eru rangt merktir, ef ummæli Ásmundar um prófkjörin eru rétt ... sem ég hef auðvitað enga ástæðu til þess að efast um.“

Segir forseta þingsins ekki sjá það augljósa

Næst vísar Björn í texta tilkynningar skrifstofu Alþingis, þar sem segir að það sé starfsmönnum skrifstofunnar þungbært að sitja undir ásökunum um að greiða tilhæfulausa reikninga og gæta ekki meðferð almannafjár. „Skrifstofan endurgreiddi augljóslega tilhæfulausa reikninga vegna ÍNN. Það er staðreynd.

Það þýðir ekki að það sé skrifstofunni að kenna. Eins og fram hefur komið í skjölum málsins er þingmönnum treyst til þess að leggja fram rétta reikninga. Skrifstofan er fáliðuð, fagleg og hjálpsöm en það væri gríðarlegt verk að hringja á eftir öllum ferðum út af öllum reikningum.

Það sem ég gagnrýni helst snýr auðvitað að forseta og meirihluta forsætisnefndar, sem virðist ekki sjá það augljósa. Skrifstofan, eins miklar hetjur og þau eru, eru kannski ekki rannsóknarteymi þegar kemur að svona málum.

Tilefnið til rannsóknar er augljóst. Að þvermóðskast gegn því er afneitun,“ skrifar Björn að lokum.