Sanna Magdalena Mörtudóttir, oddviti Sósíalistaflokksins í Reykjavík, gagnrýnir að sáttaferli sé hafið milli Íslandsbanka og Fjármálaeftirlitsins vegna hugsanlegra lögbrota bankans þegar ríkið seldi 22,5 prósenta hlut í bankanum í fyrra.
Sanna Magdalena segir að slíkt ferli sé ekki í boði fyrir þá sem minna mega sín hér á landi.
„Sáttaferli er ekki í boði fyrir þau sem geta ekki greitt niður yfirdráttarheimild og eru í mínus um hver mánaðamót. Sáttaferli er ekki í boði fyrir þau sem vegna fátæktar gátu ekki greitt reikninga. Sáttaferli er ekki til staðar hjá innheimtufyrirtækjunum sem leyfa þér bara að borga meira en þú ræður við. Sáttaferli og skilningur er ekki til staðar gagnvart þeim sem gera sitt besta og meira en það til að komast af í ómanneskjulegu kerfi fátæktar og skorts. Sáttaferli er aldrei sýnilegt í lánshæfismati. Creditinfo fyrirgefur ekki. Sáttina má hvergi finna gagnvart þeim fátæku sem skulda. Sáttin er í boði fyrir sum en ekki öll,“ sagði Sanna Magdalena í færslu á Facebook-síðu sinni í gærkvöldi.
