Sarah Palin, fyrrverandi varaforsetaefni Repúblikana, hefur greinst með Covid-19 en hún er óbólusett.

Þetta kom fram í dómsal í meiðyrðamáli Palin gegn New York Times og er greint frá á vef CNBC. Palin leitar réttar síns í máli gegn Times vegna umfjöllunar frá árinu 2017 um að mynd frá pólitískri aðgerðanefnd Palin hafi kynt undir skotárásina á bandarísku þingkonuna Gabrielle Giffords.

Þetta er í annað sinn sem Palin greinist með kórónaveiruna en hún lýsti því yfir fyrir nokkru að hún myndi aldrei fá bóluefni gegn Covid. „Fyrr skal ég dauð liggja,“ sagði hún.

Beðið er eftir niðurstöðum úr seinni skimun áður en ákveðið verður hvort fresta þurfi þinghaldi.