Þuríður Harpa Sigurðardóttir, formaður Öryrkjabandalagsins, segir það vera sjálfsagt réttlæti að fötluðu fólki sé veitt 60 þúsund króna skattlaus eingreiðsla í desember vegna þess ástands sem hefur verið í samfélaginu undanfarin ár.

Þetta er meðal þess sem kemur fram í nýjum pistli Þuríðar Hörpu á vef Vísis.

Þuríður Harpa vísar meðal annars til kórónuveirufaraldursins og verðbólgunnar sem herji verst á þá sem minnst hafa.

„Fatlað fólk hefði í raun átt á fá verðbætingu á lífeyri sinn að upphæð nær 120.000 kr. fyrir árið 2022 en það er það högg sem fólk hefur tekið á sig auk þess sem hækkun á örorkulífeyri um að minnsta kosti 10% er nauðsynleg aðgerð til að bilið milli lágmarkslauna og örorkulífeyri gleikki ekki enn frekar,“ segir Þuríður Harpa í pistli sínum.

Þuríður Harpa segir stöðu fatlaðs fólks hafa farið versnandi ár frá ári síðan 2007. Nú sé svo komið að heildar mánaðargreiðsla um 40 prósent öryrkja sé um og undir 300 þúsundum króna fyrir skatt.

„Þessi hópur og fleiri til hafa ekkert svigrúm til breytinga á verðlagi og glíma við mikinn lágtekjuvanda. Að lifa af tekjum undir 300 þúsundum er ómögulegt og það vita öll sem einhverja tengingu hafa við veruleika lágtekjuhópa,“ segir hún og heldur áfram: „Verðbólga ársins 2022 hefur reynst fötluðu fólki afar þungbær, leiga hækkar mánaðarlega sem og matarkarfan. Þetta tvennt, fæði og húsnæði er nauðsynjavara ekki munaður.

Örorkulífeyrir hefur ekki hækkað að sama skapi þó þriggja prósentu hækkun hafi komið inn í júní. Það er því afar brýnt að stjórnvöld hækki lífeyri til að bilið á milli lífeyris og lágmarkslauna aukist ekki enn frekar.“

Á meðan beðið sé aðgerða sem á að taka á rót vandans sé það sjálfsögð og sanngjörn krafa að fatlað fólk fái 60 þúsund króna skattlausa eingreiðslu nú í desember.