Utanríkismál

Samstarfið trompar stefnu VG

Þingmenn VG segja að flokkurinn væri óstjórntækur á Íslandi ef áhersla hans gegn NATO væri ófrávíkjanleg. Nokkur umsvif verða á næstu misserum vegna NATO og áhugi Bandaríkjanna á Íslandi eykst á ný.

Þingflokkur Vinstri grænna fundaði í þinghúsinu í gær og ræddi meðal annars viðbrögð stjórnvalda við loftárásum vesturveldanna. Fréttablaðið/Ernir

Loftárásirnar um liðna helgi og viðbrögð ríkisstjórnarinnar voru til umræðu á fundi þingflokks Vinstri grænna í gær og þrátt fyrir afstöðu Rósu Bjarkar Brynjólfsdóttur herma heimildir blaðsins að góð samstaða hafi verið á fundinum.

Ástandið í heimsmálunum virðist ætla að koma illa heim og saman við stefnu VG í öryggis- og varnarmálum. Ekki nóg með að Ísland, sem aðili að NATO, hafi ásamt öðrum ríkjum bandalagsins lýst stuðningi við loftárásir Bandaríkjamanna, Breta og Frakka í Sýrlandi, heldur má ætla að umsvif NATO verði töluverð á næstu misserum og fleiri tilvik komi upp þar sem afstöðu eða aðgerða ríkisstjórnar Katrínar Jakobsdóttur verði krafist.

Þannig stendur til að mynda stór heræfing NATO-ríkja fyrir dyrum í Noregi í haust og þó að þátttaka Íslendinga verði takmörkuð verður í aðdraganda hennar haldin minni æfing hér á landi með einhverri þátttöku íslenskra stofnana. Samkvæmt upplýsingum frá utanríkisráðuneytinu liggur ekki enn fyrir með hvaða hætti Ísland tekur þátt í þeirri æfingu.

Í friðarstefnu VG er tekin skýr afstaða gegn heræfingum hér á landi. Raunar er VG eini flokkur landsins sem haft hefur í hávegum þá friðarstefnu íslenskra vinstrimanna sem mótaðist í kjölfar síðari heimsstyrjaldarinnar fyrir um 70 árum. Hornsteinar hennar hafa verið úrsögn úr NATO og herinn burt. Þótt flestir hafi talið að síðarnefnda baráttumálinu væri lokið með fullnaðarsigri hafa kólnandi samskipti Vesturlanda og Rússlands haft þau áhrif að Bandaríkjaher hefur fengið nokkurn áhuga á aðstöðu á Keflavíkurvelli á ný.

Þessu heldur Albert Jónsson, fyrrverandi sendiherra Íslands bæði í Moskvu og Washington, fram í ritgerð á vefsvæði sínu. Albert segir þann áhuga þó ekki lúta að fastri viðveru heldur tímabundinni staðsetningu kafbátaleitarflugvéla, annars vegar til æfinga og hins vegar til að leita að og veita rússneskum kafbátum eftirför, sjáist þeir á kreiki nálægt landinu.

En þingmenn flokksins standa keikir. Valið stendur milli friðarstefnunnar og þátttöku í ríkisstjórn.

Hvað segja þingmenn Vinstri grænna um málið?

Ari Trausti Guðmundsson: Ef vinstri græn ætluðu alltaf að halda þessu til ýtrasta málstaðar, þá sætu þau náttúrulega aldrei í ríkisstjórn því þetta er eini flokkurinn á Íslandi sem vill úrsögn úr NATO og er andvígur öllum hernaðaríhlutunum.

Kolbeinn Óttarsson Proppé: Það var alveg skýrt, alveg frá upphafi, að þessi ríkisstjórn myndi ekki starfa eftir hreinni stefnu vinstri grænna í utanríkismálum. Hún er mynduð um mjög samfélagslega mikilvæg verkefni en því miður eru ekki fleiri flokkar með okkar góðu stefnu um að Ísland skuli standa utan allra hernaðarbandalaga.

Steinunn Þóra Árnadóttir: Ég hef sagt og ítrekað að það er stefna VG að vera utan herðnaðarbandalaga. En við ákváðum að fara í þetta ríkisstjórnarsamstarf þrátt fyrir að fyrir lægi að við værum ekki sammála um þessi mál og það væri alveg sama hvaða ríkisstjórnarsamstarf við hefðum farið inn í, við höfum alltaf aðra skoðun á NATO en aðrir flokkar. En við erum ekki eins máls hreyfing þannig að ég legg áherslu á að við sem hreyfing tölum fyrir okkar friðarstefnu og reynum að afla henni fylgis.

Rósa Björk Brynjólfsdóttir: Stefna VG verður að koma fram með skýrari hætti í utanríkisstefnu Íslands, það er mín skoðun og ég mun ekki hvika frá henni. Hernaðaraðgerðir koma ekki á friði. Pólitískar við- ræður og diplómatískar lausnir koma á friði.

Athugasemdir

Auglýsing
Auglýsing

Tengdar fréttir

Utanríkismál

Greitt 160 milljónir í leigu á sendiherrabústað

Utanríkismál

Misánægð með nýja sendiherrann

Utanríkismál

Ís­land kjörið í mann­réttinda­ráðið í dag

Auglýsing

Nýjast

Ör­vænting þegar bilaður rúllu­stigi þeytti fólki áfram

Jón leiðir sam­starfs­hóp gegn fé­lags­legum undir­boðum

Niður­staða á­frýjunar­nefndar til skoðunar hjá Isavia

Fundu muni hinnar látnu við handtöku

Aurus Arsenal er hærri gerð forsetabíls Putin

Heið­veig: „Aldrei gengið erinda stór­út­­gerðanna“

Auglýsing