Ísland er í þriðja sæti á lista yfir samkeppnishæfustu lönd þegar kemur að vinnuafli í skýrslu samkeppnisstofnunarinnar IMD í Lausanne. Hefur Ísland hækkað um fjögur sæti á listanum á einu ári.
Í skýrslunni kemur fram að meðal styrkleika Íslands sé áhersla á menntun, fjöldi menntaðs fólks, tungumálakunnátta og árangur í fjárfestingum og nýsköpun.
Í efsta sæti er Sviss og þar á eftir kemur Svíþjóð. Öll Norðurlöndin eru á meðal efstu tíu á listanum. Þýskaland er í 10. sæti, Bandaríkin í 16., Bretland í 28. og Kína í 40. sæti. Hæst stökk Perú, um 16 sæti, en Nýja-Sjáland féll um 13.
Samkvæmt IMD hefur hreyfanleiki starfsfólks minnkað síðan faraldurinn skall á. Þetta hefur ekki gengið að fullu til baka enn þá.
