Við höfum alla okkar búskapartíð verið í suðurhlíðum Kópavogs og höfðum lengi leitað að húsi sem passaði fyrir stóru fjölskylduna okkar,“ segir Ragnhildur en eitt og hálft ár er síðan fjölskyldan flutti inn. „Þá var ekkert tilbúið, ekki einu sinni herbergjaskipan.“

Eins og fyrr segir er fjölskyldan í stærri kantinum en með þeim Ragnhildi og eiginmanni hennar Inga Sturlusyni búa börnin þeirra fjögur, tengdasonur og tvær kisur.

„Það sem heillaði okkur var því fyrst og fremst staðsetningin, en síðan voru það óendanlegu möguleikarnir sem húsið bauð upp á. Við vildum stórt samverurými því bæði er fjölskyldan mjög samhent og svo erum við öll svo óskaplega félagslynd að það er alltaf einhver með vini í heimsókn. Við vildum því að það væri auðvelt að bæta fjórum til fimm manns við matarborðið.“

Nóg af borðplássi og gott rými var það sem skipti Ragnhildi miklu. Eldhúsið var teiknað upp enda er þar eldað fyrir sjö hvert kvöld vikunnar og pláss þarf einnig að vera fyrir sjö að ganga frá. Fréttablaðið/Ernir

Húsið var byggt árið 1969 og flest allt upprunalegt en að sögn Ragnhildar því miður of illa farið til að nýta.

"Við hjónin höfum tvisvar áður gert upp húsnæði og þá reyndum við að halda aðeins í söguna. Ég reyndi mitt besta til að passa hitt og þetta, sem síðan þurfti á endanum að fara.“


Herbergjaskipan hússins var ekki í samræmi við þarfir fjölskyldunnar og því var ráðist í að breyta henni.

„Í raun var allt hreinsað út, gólfefni, veggir, rafmagn og pípulagnir. Eldhúsið var fært því við vildum fanga morgunsólina í opnu rými og baðherbergi voru stækkuð.

Baðherbergið var stækkað og veggurinn þykktur til að koma fyrir innbyggðri hillu. „Inga datt í hug eitt kvöldið að setja innbyggð ljós í hilluna og var hann ekki lengi að fræsa og koma fyrir ljósborðum og útkoman er flott.“

Við hefðum aldrei haft efni á að ráðast í svona framkvæmdir, nema af því að Ingi er lærður smiður þó að hann starfi ekki við það í dag. Við erum því búin að gera næstum allt sjálf með góðri hjálp frá stórfjölskyldunni og einstökum vinum. Það er ómetanlegt.“


Tvíburasynirnir í fataherbergi

Framkvæmdir standa enn yfir og segir Ragnhildur ráðist í þær eftir þörfum.

„Fyrst þurfti að komast inn, síðan að tryggja herbergi en tvíburasynir okkar voru til dæmis í fataherbergi okkar hjóna fyrstu fjóra mánuðina, og svo koll af kolli. Þetta hefur því verið löng og ströng vegferð en sem betur fer býr öll fjölskyldan yfir einstakri aðlögunarhæfni og þegar hlutirnir ganga hægt, er glaðst yfir minnstu hlutum, til að mynda innstungu sem virkar eða hurð á baðherbergið.“

Stofan og eldhúsið liggja í kringum hlaðinn vegg og arin. Borðstofuborðið tengir síðan saman eldhúsið og stofuna. Hér finnst fjölskyldunni gott að vera. Fréttablaðið/Ernir

Borðum alltaf saman


Aðspurð um sinn uppáhaldsstað í húsinu á Ragnhildur erfitt með að gera upp á milli eldhúss og stofu.

„Við erum mikið matfólk, borðum alltaf saman öll kvöld og á því eru engar undantekningar. Þegar ég innréttaði eldhúsið lagði ég ríka áherslu á að eldavélin væri á eyjunni svo ég gæti hrært í pottum og stússast á meðan ég væri að tala við mitt fólk.

Mér finnst líka óskaplega notalegt að sitja á móti Inga og ræða málin þegar hann stendur yfir pottunum. Við stofnuðum líka Röggu&Ingabar í eldhúsinu en þangað geta vinir kíkt í vínglas og spjall eftir þörfum.

Hér má sjá hlaðna vegginn vísa út í stofuna og arininn sem er mikið notaður. Fremst má einnig sjá nýjasta fjölskyldumeðliminn, Fjólu sem var fyrir 3 mánuðum 900 grömm en er nú að nálgast þrjú kíló. Fréttablaðið/Ernir

Töfrarnir við borðstofuborðið


"Borðstofuborðið tengir saman eldhúsið og stofuna og þar gerast töfrarnir. Það er óskrifuð regla að það sitja aldrei allir við matarborðið á matmálstíma.

Tvíburarnir eru mjög fjörugir og ósjaldan er einn lagstur í sófann, annar kominn undir borð eða jafnvel einhverjir búnir að skipta um sæti. Þetta er borðhald að mínu skapi – það er svo tilbreytingarlaust ef allt er samkvæmt bókinni. Í stofunni er stór sófi, mikil birta og gott rými til að kúra og tala saman. Mér finnst ótrúlega dýrmætt að börnin vilja ennþá skríða í mömmufang og það eru þessi litlu móment sem gera allt.

Hjónin vildu hafa stóra eldhúseyju sem myndi ramma vel inn eldavélina og börn og aðrir gætu setið við hana. Þau notuðu risastórar flísar sem borðplötu og spöruðu þannig verulegar fjárhæðir.

Ragnhildur segir þau hjón hafa reynt að sýna hagsýni í framkvæmdunum. „Það krefst þolinmæði og þrautseigju. Við erum orðin rosalega góð í að láta okkur dreyma um hina og þessa hluti og það býr til skemmtileg sameiginleg markmið.


Það sem okkur finnst skemmtileg viðbót við þetta allt er lærdómurinn sem börnin hafa dregið af þessu ferli. Hlutirnir gerast ekki á einni nóttu, það kostar að útbúa heimili og það er ekkert sjálfgefið að hafa rennandi vatn,“ segir hún að lokum.

Stigaopið með risastórum glugga sem áður var falinn. „Við tókum niður stóran vegg sem lokaði stigaopinu og settum ljósgráar hillur úr ikea. Í þessum glugga náum við kvöldsólinni inn í eldhús.
Ragnhildur segir eiginmanninn ekki hafa verið vissan um gyllta kranann en hann sé farinn að læra að hugmyndir hennar komi yfirleitt vel út .Fréttablaðið/Ernir
Við vildum stórt samverurými því bæði er fjölskyldan mjög samhent og svo erum við svo óskaplega félagslynd að það er alltaf einhver með vini í heimsókn. Við vildum því að það væri auðvelt að bæta fjórum til fimm manns við matarborðið.“ segir Ragnhildur