Veðurstofan spáir suðvestan 13 til 20 metrum á sekúndu og éli í dag, hægari vindur og þurrt að kalla austanlands.
„Áfram stjórnar sama lægð veðrinu á öllu landinu, þó dálítið minni ákefð í örlítið minni vindi," segir í hugleiðingum veðurfræðings.
Á morgun er spáð suðvestan 10-18 metrum á sekúndu, hvassast norðvestan til, en hægari vindur um sunnan- og suðaustanvert landið. Dálítil él sunnan- og vestanlands. Dregur enn frekar úr vindi annað kvöld, suðlæg átt 3-10 metrar á sekúndu þá. Hiti nálægt frostmarki.
Gular viðvaranir eru í gildi víðs vegar um landið, á Suðurlandi, Faxaflóa, Breiðafirði, Vestfjörðum, Ströndum og norðurlandi vestra og Miðhálendinu.
Veðurhorfur á landinu næstu daga
Á sunnudag:
Austan og suðaustan 8 til 15 metrar á sekúndu og slydda eða snjókoma með köflum sunnan til, en hægari norðlæg átt og él fyrir norðan. Snýst í vestlægari átt sunnan til með dálitlum él eftir hádegi. Frost víða 0 til 6 stig, en hiti 0 til 5 stig syðra.
Á mánudag:
Hæg breytileg átt, skýjað með köflum og frost 1 til 10 stig. Vaxandi suðaustanátt síðdegis og þykknar upp, 13 til 18 metrar á sekúndu og snjókoma eða slydda suðvestanlands um kvöldið og hlýnar heldur.
Á þriðjudag:
Allhvöss eða hvöss suðaustanátt með rigningu í fyrst, síðar suðlægari með skúrum eða slydduéljum, en léttir til norðaustanlands. Hiti 1 til 8 stig, mildast á Suðausturlandi.
Á miðvikudag:
Ákveðin suðlæg átt með éljum, en norðaustanhvassviðri og snjókoma norðvestan til. Úrkomulítið norðaustan til. Kólnandi veður.
Á fimmtudag:
Útlit fyrir hvassa norðanátt og snjókomu eða éljagang, en úrkomuminna sunnan heiða og talsvert frost um land allt.
