Bergþóra Einarsdóttir segir í viðtali við Stundina í dag að skáldið Magnús Þór Jónsson, Megas, hafi ásamt öðrum manni beitt sig kynferðislegu ofbeldi árið 2004. Hún lagði fram kæru á hendur þeim árið 2010 en þá sagði lögregla brotið vera fyrnt og ríkissaksóknari sá ekki tilefni til að endurskoða ákvörðunina.

Bergþóra segir í viðtalinu við Stundina að hún hafi síðar lesið textann við lagið Litla ljót, nafn sem Megas hafi kallað hana fyrir atburðinn, og séð þar hrópandi samsvörun við það sem hafi átt sér stað.

Fraus og þorði ekki að gera neitt

Hún segir brotið hafa átt sér stað á heimili yfirmanns síns á veitingastað þar sem hún vann. Þeir hafi báðir vitað að hún væri á viðkvæmum stað í lífinu, fram að því hafi hún álitið Megas vera vin sinn. Yfirmaður hennar hafi rifið hana úr buxunum.

„Ég fékk áfall, fraus og þorði ekki að gera neitt,“ segir hún í viðtalinu. „Það var eins og ég væri lokuð inni í sjálfri mér og að fylgjast með þessu utan frá. Ég vildi bara passa að þeir færu ekki inn í mig. Þú ert bara að reyna að lifa af. Þú veist ekki hversu langt þetta mun ganga. Mín leið til að lifa af var að halda fyrir kynfærin á mér.“

Daginn eftir hafi hún vaknað í aðstæðum sem voru „viðbjóðslegri en hún hefði nokkurn tímann getað ímyndað sér“, með tvo nakta gamla karla við hlið sér, segir í viðtalinu.

Bergþóra hafnar því alfarið að það sem átti sér stað hafi verið með samþykki hennar. „Ég gaf aldrei samþykki fyrir því sem þeir gerðu og þetta var aldrei það sem ég vildi. Ég var notuð. Þeir tóku frá mér eitthvert sakleysi sem ég skildi að ég fengi aldrei aftur og það var rosalega sárt.“

Hrópandi samsvörun í textanum

Árið 2015 las hún textann við lagið Litlu ljót, hún segir að þegar hún hafi lesið textann hafi þyrmt yfir hana og samsvörunin í textanum við atburði þessa kvölds væri hrópandi. Bergþóra segir að henni hafi liðið eins og hún hafi verið misnotuð aftur í öðru veldi.

Bergþóra segir að hún hafi ekki stigið fram fyrr af ótta við afleiðingarnar, bæði fyrir sig og þá. „Ég vona að fólk dæmi þá sem einstaklinga, ekki sem einhver ógeð þótt það sem þeir gerðu hafi verið ógeðslegt og þeir þurfa að gangast við því. Mín gjöf til þeirra er tækifærið til þess. Þeir þurfa þá allavega ekki að taka það með sér í gröfina.“

Fram kemur í Stundinni að Megas hafi ekki haft hug á því að ræða við blaðamann vegna málsins.

Hér má lesa Stundina í dag þar sem ítarlega er fjallað um málið.