„Ég var rekinn án útskýringa og án þess að fá áminningu. Það var talað um trúnaðarbrest, sem ég veit ekki hver á að vera. Síðan fékk ég að vita að ástæðan var að Sólveigu Önnu [Jónsdóttur, formanni Eflingar] fannst stafa einhver ógn af mér í valdabaráttunni. Vænisýkin var orðin algjör,“ segir Maxim Baru, fyrrverandi sviðsstjóri félagssviðs Eflingar. Samstarfsfólk Maxims af félagssviði Eflingar sem ræddi við Fréttablaðið staðfestir frásögn hans.

Maxim, eða Max eins og hann er iðulega kallaður, var ráðinn inn á þetta nýja svið fyrir ári. Hann segist hafa verið ráðinn til að skipuleggja verkfallsaðgerðir félagsins. Max telur eina ástæðu brottrekstrarins þá að honum hafi ekki verið treyst til að standa á bak við kjarasamningana. Stjórn og trúnaðarmenn hafi verið skikkuð til að fá félagsmenn til að samþykkja samninginn.

Viðar Þorsteinsson, framkvæmdastjóri Eflingar, segir það mjög leitt þegar einstaklingar eigi ekki samleið með félögum á vinnustað sínum. „Það er líka leitt ef fólk getur ekki sætt sig við orðinn hlut og kýs að reka mál í fjölmiðlum.“ Hann segir þessi mál hafi verið borin upp víða á vettvangi félagsins, meðal annars í stjórn og trúnaðarráði. Þar hafi ekki verið gerðar athugasemdir við þá ákvörðun að láta Max fara.

„Það er ekki hlutverk starfsmanna Eflingar að vera með einhverja sjálfstæða pólitíska markmiðasetningu eða móta stefnu félagsins sjálfstætt.“

Max segir að hans uppsögn sé annars eðlis en fjármálastjóra, bókara og fyrrverandi skrifstofustjóra Eflingar sem hafa gagnrýnt félagið. Ólíkt honum hafi þau verið andsnúin stefnu nýrrar forystu frá upphafi og ekki viljað neinar róttækar breytingar.

Í framlínu verkfallsaðgerða

Félagssvið Eflingar var stofnað haustið 2018 og Maxim Baru, eða Max eins og hann er iðulega kallaður, var ráðinn sem sviðsstjóri. Hann er frá Kanada og segist hafa verið ráðinn á þeim forsendum að skipuleggja verkfallsaðgerðir félagsins. Var hann í framlínunni í verkfallsaðgerðum Eflingar í vor.

„Ég var á góðum launum, vann náið með forystunni til að byrja með og skrifaði meira að segja hvað Sólveig Anna átti að segja um verkföllin. Síðan hvarf hún alveg inn í kjaraviðræðurnar. Á meðan var ég með hóp starfsmanna að vinna hörðum höndum að skipulagi,“ segir Max.

„Við vorum hópurinn sem fór á vinnustaði og töluðum pólsku og sýndum félagsmönnum hvernig þeir gátu kosið,“ segir Max.

Christina Milcher, sem starfaði á félagssviði Eflingar, og Eliasz Robakjewicz, sem starfaði í verkfallsteyminu, segja bæði að Max hafi verið kallaður á fund nokkrum dögum fyrir undirritun kjarasamninganna, hann hafi ekki fengið að hafa neinn með sér. „Hann var rekinn, okkur var bara tilkynnt um þetta án málalenginga,“ segir Christina. Eliasz tekur undir þetta. „Við vorum búin að vinna langa daga og vorum að skipuleggja verkföll rútubílstjóra,“ segir Eliasz. „Við, þar með talinn Max, fórum aldrei gegn forystu Eflingar. Þau voru mjög ánægð framan af, síðan myndaðist mikil spenna í kringum viðræðurnar.“

Max Baru
Fréttablaðið/Sigtryggur Ari

Uppsögn tók gildi samdægurs

Engar ástæður eru gefnar fyrir uppsögninni í bréfi Sólveigar Önnu Jónsdóttur, formanns Eflingar, til Max dagsettu 29. mars annað en að uppsögnin sé varanleg og taki gildi samdægurs. Max segir ástæðuna vera þá að Sólveig Anna og hennar nánustu samstarfsmenn hafi á einhvern hátt óttast að hann væri að verða of valdamikill.

Var það skilningur þeirra sem unnu með Max að þau myndu starfa áfram eftir að Efling semdi til að taka þátt í að skipuleggja verkföll opinberra starfsmanna. Hópurinn var leystur upp í kjölfar brottvikningar Max.

Fram kemur í bréfi Sólveigar Önnu til starfsmanna félagssviðs að það verði fljótlega farið yfir ástæður þess að Max var rekinn. „Það var alvarlegur trúnaðarbrestur milli mín og Max Baru. Eina lausnin var að reka hann frá Eflingu,“ segir í bréfi Sólveigar, dagsettu 31. mars síðastliðinn. Í bréfinu segir einnig að hún voni að starf hópsins muni halda áfram.

Christina segir að stjórnarmeðlimir, starfsmenn og meðlimir samninganefndar Eflingar hafi óskað eftir að funda með Sólveigu Önnu, Viðari Þorsteinssyni framkvæmdastjóra og Berglindi Rós Gunnarsdóttur, sviðsstjóra skrifstofu- og mannauðssviðs, varðandi brottreksturinn. Boðaðir hafi verið tveir fundir en Berglind og Viðar hafi aflýst þeim báðum.

Í bréfi sem Christina sendi Sólveigu Önnu, Viðari og Berglindi 4. apríl segir hún að það sé skilningur margra að brottrekstur Max megi rekja til valdabaráttu sem gæti komið félaginu illa. Stuttu síðar fundaði hún með Viðari og fór í kjölfarið í leyfi.

Vonbrigði með samninginn

Max segir forystu Eflingar hafa skikkað stjórnarmenn og trúnaðarmenn til að fá félagsmenn til að samþykkja kjarasamninginn við Samtök atvinnulífsins. Því hafi hann ekki viljað taka þátt í.

„Það voru almenn vonbrigði með samninginn. Það sjá það allir sem bera saman kröfugerðina og lokaniðurstöðuna. Það voru lokaðir fundir þar sem fólki var beinlínis skipað að samþykkja samninginn. Hátt sett fólk var að segja við mig að því hefði verið skipað að halda kjafti. Þau vildu ekki hafa mig á vinnustöðunum að tala um innihaldið,“ segir Max. „Það er mjög sorglegt að svona hafi farið, við héldum að eitthvað myndi breytast með nýrri forystu.“