Fyrrverandi starfsmenn bílasölunnar Bensinlaus.is saka forkólfa hennar um stórfelld og alvarleg svik á hendur viðskiptavinum sem fái ekki í hendur þá rafbíla sem þeir hafi greitt fyrir – og í sumum tilvikum staðgreitt.

Þetta þekkir Jóhannes Þór Jóhannesson, ellilífeyrisþegi sem hefur ekki enn séð nýjan Ford Mustang sem hann keypti af Bensinlaus.is fyrir rúmum þremur mánuðum, þann 11. janúar síðastliðinn. Hann greiddi bílasölunni 1,5 milljónir við undirskrift samningsins og afganginn, 6,4 milljónir, fjórum dögum seinna.

„Bílasalarnir svara ekki í síma og munu núna vera komnir til Marbella á Spáni,“ segir Jóhannes Þór sem hefur reynt að rifta sölunni án árangurs. Lögmaður hans vinnur að málinu sem hefur verið tilkynnt til lögreglu og er aðgerða af hennar hálfu að vænta, að sögn Jóhannesar Þórs.

Fjórir lykilstarfsmenn bílasölunnar gengu nýverið á dyr vegna þessara viðskiptahátta, en þar eru á ferðinni aðstoðarframkvæmdastjóri, sölustjóri, innkaupastjóri og mannauðsstjóri.

„Við vitum að stjórnendur Bensinlaus.is eru að sýna viðskiptavinum verksmiðjupantanir á bílum úti á meginlandi Evrópu sem enginn fótur er fyrir, en með eftirgrennslan vegna nokkurra svona tilvika komst ég að því að engin pöntun lá fyrir,“ segir Jóhanna Pálsdóttir, fyrrverandi innkaupastjóri hjá bílasölunni.

Gísli Gíslason, fyrrverandi sölustjóri hjá Bensinlaus.is, staðfestir þessa sögu og segir að hluti svikanna sé að seinka ítrekað afhendingu bílanna hér á landi. „Ég hef staðfestar heimildir fyrir því að bílar eins og Jóhannesar Þórs sem áttu að vera á hafnarkantinum í Bandaríkjunum og biðu lestunar um borð í skip Eimskips, að sögn, voru ekki á staðnum.“ Hann bætir því við að forvígismenn Eimskips hafi sent starfsmann til að athuga hvort hér hafi verið um mistök að ræða, en reyndin hafi verið sú að engir bílar á vegum Bensinlaus.is hafi verið skráðir á hafnarsvæðið.

„Það þarf að stoppa svona menn,“ segir Jóhannes Þór sem enn veit ekkert hvort hann fær bíl sinn frá Ameríku eða getur rift kaupunum. „Það á að loka reikningum þeirra.“

Ívar Máni Garðarsson, framkvæmdastjóri Bensinlaus.is, svaraði ekki símtölum blaðsins fyrir prentun þess í gærkvöld.