Þegar ég er í meðferðinni þá byrja ég svo með manninum mínum. Við höfðum verið vinir í mörg ár og ég var mjög opin með þetta allt við hann. Sagði honum á okkar fyrsta alvöru stefnumóti að ég ætlaði að eignast barn, hann gæti verið með ef hann vildi annars myndi ég finna sæðisgjafa,“ segir Súsanna sem á þessum tíma var búin að missa allt hárið og var mjög veik af lyfjunum.
„Og ekki nóg með það þá sagði ég honum að ef hann vildi vera með þá vildi ég giftast honum. Ég gat ekki hugsað mér að vera með krabbamein og barn en ógift,“ bætir hún við.
Arnar Gunnarsson, maðurinn sem um ræðir, tók þessu „eins og meistari,“ segir Súsanna. Þau giftu sig síðasta sumar og eiga saman hina fjögurra mánaða Aþenu. „Ég sagði honum hundrað sinnum að hann mætti hlaupa í burtu, það er líklega það sem ég hefði gert, þetta er rosalegur pakki. En hann sagði mér að öllu fylgi einhverskonar pakki, í okkar tilviki vissi hann allavega hvað hann ætti í vændum.“
Súsanna og Arnar byrjuðu í ferli hjá Livio stuttu eftir að þau byrjuðu saman og var ferlið erfitt, tímafrekt og kostnaðarsamt. „Við fórum í þrjár meðferðir hérna á Íslandi sem kostuðu okkur ótrúlega mikið og tóku mikið á. Strax eftir aðra meðferðina áttaði ég mig á því að vonin var ekki mikil og mér var sagt að undirbúa mig fyrir vonbrigði,“ útskýrir Súsanna sem gat þó sótt um styrk í neyðarsjóð Krafts sem hún segir að hafi hjálpað þeim mikið.
Stöðugt limbó
Á meðan á ferlinu stóð var Súsanna í stöðugu „limbói“ varðandi veikindi sín og eftir fyrstu lyfjameðferðina liðu einungis nokkra vikur þar til aftur fannst krabbamein. Hún var og hefur verið mikið síðan í lyfja-, geisla- og ljósmeðferðum. „Ég vissi aldrei og veit aldrei hvað gerist í næstu sýnatöku ég vona bara alltaf að þetta sé bara nógu lítið því þá ráða ljósin við þetta.“
Eftir fjósemismeðferðirnar þrjár hér heima á Íslandi sem ekki gengu upp ákváðu Súsanna og Arnar að fara til Grikklands og sækja meðferð þar. „Þarna höfðum við eytt öllum sparnaðinum okkar í meðferðir og ferðin og meðferðin til Grikklands kostaði 1.200 þúsund krónur. Það er náttúrulega ótrúlegt að þetta kerfi sé svona og ég sá mikið eftir sparnaðinum sem átti að fara í eitthvað allt annað en að reyna að eignast barn af því ég fékk krabbamein, við áttum ekki krónu til að gera þetta,“ segir Súsanna.
Hún segist ævinlega þakklát vinkonum sínum sem settu af stað söfnun á Facebook og söfnuðu 800 þúsund krónum fyrir ferðinni og meðferðinni í Grikklandi. „Mér finnst ótrúlega erfitt að þiggja og betla peninga en þetta var þess virði,“ segir Súsanna og vísar til þess að meðferðin í Grikklandi gekk upp og hún varð ólétt af Aþenu.
