Mál nemenda þar sem nöfn þeirra voru rituð á spegla á salernum skólans við Menntaskólann í Hamrahlíð í tengslum við kynferðisbrotamál hefur verið ítarlega skoðað af ráðgjafahópi á vegum mennta- og barnamálaráðuneytisins.

Samkvæmt skoðun hópsins kom í ljós að í sumum tilvikum voru engar skýringar eða upplýsingar um ástæðu þess að nöfn nemenda hafi verið rituð á speglana eða þau með öðrum hætti hafi verið tengd umfjölluninni. Í þeim tilvikum hafi engar kvartanir borist yfir kynferðislegri áreitni eða ofbeldi af hálfu viðkomandi nemenda.

Frá þessu er greint á vef Menntaskólans við Hamrahlíð.

Á vef skólans er tekið dæmi af sögu sem fór á flug í skólanum um að tiltekinn nemandi hafi nauðgað litlu frænku sinni. Sú saga hafi ekki fengið neina stoð þrátt fyrir ítarlega könnun ráðgjafahópsins.

Þá segir jafnframt að sagan hafi upprunalega farið á flug þegar nemandinn stundaði nám í öðrum skóla og að hún hafi endurtekið sig í MH.

Ráðgjafahópur á vegum mennta- og barnamálaráðuneytisins var settur á laggirnar í kjölfar byltingar nemenda við Menntaskólans við Hamrahlíð í október síðastliðnum.

Nemendur voru komnir með nóg af aðgerðarleysi skólastjórnenda í kynferðisbrota- og ofbeldismálum og mótmæltu harðlega. Nemendur sögðust ekki kæra sig um að stunda nám með meintum gerendum.

Samkvæmt vef skólans kemur fram að meðferð málanna hjá ráðgjafahópnum sé nú lokið eða á lokametrunum.

„Niðurstaða ráðgjafahópsins í þeim málum sem tilkynnt voru var sú að nemendur hafi orðið fyrir einelti og útilokun við það að nöfn komu fram með áðurgreindum hætti eða nöfn þeirra tengd umfjölluninni. Nafnaritunin fór í mikla dreifingu innan og utan skólans.

MH ítrekar að í kjölfar þessara mála samþykkti skólinn að verða fyrstur til að innleiða nýjar áætlanir, í samvinnu við Samband íslenskra framhaldsskólanema, sem snerta hvoru tveggja kynferðislega áreitni og ofbeldi sem og einelti. Stendur sú vinna yfir. Eru nemendur hvattir til að nýta þá ferla sem til staðar eru og tilkynna um mál ef upp koma innan skólans, þ.e. með því að leita til starfsfólks MH eða tilkynna í gegnum tilkynningahnapp á heimasíðu skólans. Skólinn ítrekar að hann stendur með öllum þolendum ofbeldis og eineltis, sama af hvaða toga slík mál kunna að vera,“ segir að lokum í tilkynningu skólans.

Fréttin hefur verið uppfærð.