Allir fjármunir sem verða lagðir inn á styrktarreikning prestakallsins á Skinnastað mun renna til fjölskyldu sem dvelur nú í Svíðþjóð til að sækja heilbrigðisþjónustu handa syni sínum sem slasaðist mikið vegna bruna. Frá þessu greinir Jón Ármann Gíslason, sóknarprestur á Facebook-síðu sinni.

„Hann er mikið slasaður, og brunasárin þekja því miður stóran hluta líkama hans. Þakka má skjót viðbrögð réttra aðila, sem komu drengnum undir læknishendur eins fljótt og verða mátti.“ útskýrir presturinn og segir að í kjölfarið hafi drengurinn verið fluttur með sjúkraflugi til Reykjavíkur og þaðan á sérhæfða deild í Uppsölum í Svíþjóð.

„Þar sem mjög góð þekking, reynsla og tækni er til staðar að meðhöndla sár af þessu tagi.“

Mikið langhlaup er framundan

Jón segir að foreldrar drengsins Ísak Sigurgeirsson og Senee Sankla hafi fylgt syni sínum til Svíþjóðar þar sem þau dvelja nú. „Batahorfur eru taldar góðar, en ljóst er að mikið langhlaup er framundan. Fyrirhugað er að þau dvelji í Svíþjóð í kringum fimm vikur, og eftir það mun löng endurhæfing taka við.“ segir hann.

Þá útskýrir hann að þessu fylgi mikið tekjutap fyrir fjölskylduna sem starfræki verslunina Ásbyrgi. „Þeim rekstri, sem þau byggja lífsafkomu sína á, geta þau eðlilega ekki sinnt með hefðbundnum hætti næstu vikur og mánuði. Þess vegna vil ég að höfðu samráði við vini og velunnara fjölskyldunnar minna á styrktarreikning prestakallsins.“

Jón hvetur fólk sem getur og má um það að koma fjölskyldunni til hjálpar á þessum erfiðum tímum. Hann segir að allt sem verði lagt inn á reikninginn næstu vikurnar muni renna óskert til fjölskyldunnar. „Munum að margt smátt gerir eitt stórt. Umfram allt er það von okkar og bæn, að Sigurgeir megi ná heilsu og kröftum á ný.“

Fjallað er um málið og rætt við föður drengsins í Fréttablaðinu á morgun.

Styrktarreikningur prestakallsins á Skinnastað:

Kennitala: 590269-6119

Banki: 0192-26-30411