Sigrún Sævarsdóttir-Griffiths tónlistarkona fékk hita og beinverki á miðvikudegi í marsmánuði 2020 og fimm dögum síðar var hún komin á sjúkrahús og greind með Covid.

Sigrún ræddi við Suðurnesjamagasín á Hringbraut um veikindin í kórónaveirufaraldrinum, en þátturinn verður sýndur í kvöld. Sigrún bjó í þriggja hæða húsi í úthverfi London og fann hvernig öndunarvegurinn lokaðist þegar hún gekk frá neðstu hæð upp að efstu hæð.

Sigrún fékk Covid í upphaf faraldurs þegar hún bjó í London. Hún lýsir mikilli ringulreið.

„Ég er að bursta tennurnar þegar ég sé að ég er að verða fjólublá í kringum varirnar,“ lýsir Sigrún. Þá fór hún inn í stofuna til mannsins sín og spurði hvort þetta væri rétt, að hún væri að verða blá á vörunum.

„Hann kveikir á vasaljósinu á símanum og bara „Guð minn góður“ og nokkrum mínútum eftir það dett ég út.“ Eiginmaður hennar var snöggur til og hringdi í sjúkrabíl en þurfti að bíða heillengi í símanum á bið.

„Það var algjört káos í London á þessum tíma. Þetta var í lok mars 2020 þegar veiran var í hámarki.“