Í fyrrinótt komu óþekktar flugvélar inni í loftrýmiseftirlitssvæði Atlantshafsbandalagsins hér við land sem hvorki höfðu tilkynnt sig til flugumferðarstjórnar né voru með ratsjársvara í gangi.

Í samræmi við vinnureglur Atlantshafsbandalagsins flugu orrustuþotur ítalska flughersins, sem eru hér á landi við loftrýmisgæslu, til móts við vélarnar frá Keflavíkurflugvelli. Ítalska flugsveitin er með sex F-35 orrustuþotur hér á landi.

Vélarnar voru auðkenndar suður af Stokksnesi. Þá kom í ljós að þarna voru á ferðinni langdrægar rússneskar sprengjuflugvélar sem voru innan loftrýmiseftirlitssvæðis Atlantshafsbandalagsins en utan íslenskrar lofthelgi.

Loftrýmisgæsla Atlantshafsbandalagsins við Ísland hefur staðið yfir síðan í byrjun júní.

Verkefnið heyrir undir svæðisstjórnstöð NATO í Uedem, Þýskalandi en Landhelgisgæsla Íslands ber ábyrgð á framkvæmdinni hérlendis, í samvinnu við Isavia.