Róbert Árni Hreiðarsson, eða Róbert Downey, er látinn. Róbert Downey var árið 2008 sakfelldur fyrir að hafa brotið kynferðislega gegn fjórum stúlkum og var svo árið 2017 kærður fyrir kynferðisbrot á ný. Hann var síðustu ár lífs síns búsettur á Spáni en samkvæmt Íslendingabók lést hann síðasta sunnudag, 19. júní.

Árið 2016, þann 16. september, var Róberti og Hjalta Sigurjóni Haukssyni veitt uppreist æra. Hjalti fékk fimm og hálfs árs fang­els­is­dóm árið 2004 fyrir gróf og ítrekuð kyn­ferð­is­brot gegn stjúp­dóttur sinni. Brotin voru framin meðan stúlkan var fimm til sautján ára göm­ul.

Mál mannanna og sú staðreynd að þeim hafi verið veitt uppreist æra skapaði miklar og heitar umræður í samfélaginu sem leiddi að enda til þess að ríkisstjórn Viðreisnar, Sjálfstæðisflokks og Bjartrar framtíðar sprakk eftir aðeins nokkurra mánaða samstarf eftir að Sigríður Andersen upplýsti í viðtali að faðir þáverandi forsætisráðherra, Bjarna Benediktssonar, hafði verið meðmælenda Hjalta Sigurjóns þegar hann fékk uppreist æru.

Benedikt Sveinsson, faðir Bjarna, baðst síðar afsökunar á því að hafa skrifað undir meðmæli en sagði í afsökunarbeiðni sinni að hann hafi talið sig hafa verið að gera góðverk.

Forsíða Fréttablaðsins daginn sem ríkisstjórnin sprakk.
Skjáskot/Fréttablaðið

Út frá umræðum spratt upp byltingin #höfumhátt og í viðtali við Fréttablaðið þann 16. september, daginn eftir að ríkisstjórnin sprakk, opnaði fjölskylda eins þolanda Róberts sig um málið og af hverju þau stigu fram. Viðtalið er hægt að lesa hér.