Ung vinstri græn fordæma ákvörðun ríkisstjórnarinnar að hefja á ný endursendingar á flóttafólki til Grikklands. Á samt tíma lýsa þau yfir ánægju sinni á ummælum Guðmundar Inga Guðbrandssonar, félagsmálaráðherra og varaformanns flokksins, sem sagði Jón Gunnarsson dómsmálaráðherra fara með rangt mál um samstöðu innan ríkisstjórnarinnar og sagðist óánægður með störf hans í málaflokknum.

Þetta kemur fram í yfirlýsingu Landsstjórnar Ungra vinstri grænna sem birtist á síðu félagsins í dag. Þar er því haldið fram að ríkisstjórnarsamstarf Vinstri grænna, Framsóknar og Sjálfstæðisflokks megi aldrei verða mikilvægara en mannúð.

„Landsstjórn Ungra vinstri grænna fordæmir þá ákvörðun íslenskra stjórnvalda að hefja á ný endursendingar á fólki til Grikklands. Við lýsum yfir ánægju með yfirlýsingar varaformanns VG í fréttum RÚV í gærkvöldi og hvetjum okkar fólk til að gera allt sem í þeirra valdi stendur til að koma í veg fyrir að þessari ákvörðun verði framfylgt. Stefna VG í málaflokknum er skýr og nú ríður á að hafa hugrekki til að standa með okkar sannfæringu þó svo samstarfsflokkarnir og þeirra ráðherrar séu ef til vill á öðru máli. Ríkisstjórnarsamstarfið má aldrei verða mikilvægara en mannúð.“

Ung vinstri græn taka skýrt fram að það sé ríkisstjórn Íslands sem keyri ákvörðunina áfram og benda á að Grikkland sé ekki öruggt land fyrir flóttafólkið sem á að senda þangað.

„Ítrekað hefur komið fram að Grikkland sé ekki öruggt land, þrátt fyrir að vera á lista yfir slík lönd, og styðja frásagnir fólks af aðstæðum þar í landi við það. Annað sem styður við það er ákvörðun íslenskra stjórnvalda fyrir nokkrum árum um að hætta að endursenda fólk í hæliskerfinu í Grikklandi vegna óviðunandi aðstæðna þar. Sú ákvörðun nær þó ekki til fólks með vernd í Grikklandi og er það með öllu óskiljanlegt. Það er ljóst að ekkert bíður þessa hóps nema örbirgð, óöryggi, skortur á nauðsynlegri heilbrigðisþjónustu og algjört vonleysi.“

Þá er því haldið fram að fólksflótti í heiminum orsakist að mestu af lifnaðarháttum og hernaðarbrölti vestrænna ríkja og því þurfi Ísland að gangast við ábyrgð sinni og taka á móti fleira fólki en hefur viðgengist. Að lokum hvetur Landstjórnin ríkisstjórnina til að draga til baka ákvörðunina um endursendingarnar.

„Landsstjórn Ungra vinstri grænna hvetur ríkisstjórn Íslands eindregið til að draga til baka ákvörðun sína um endursendingar flóttafólks og líta til mannúðarsjónarmiða og félagslegs ávinnings fyrir samfélagið okkar.“