Ríkislögreglustjóra þykir leitt að aðgerðir lögreglu við leit að strokufanga hafi bitnað á saklausum unglingsdreng í strætó. Þetta kemur fram í tilkynningu frá lögreglu.
Í tilkynningunni segir að ábending hafi borist um að drengurinn væri sá sem var lýst eftir, en sjálfur hafði drengurinn ekkert unnið sér til sakar.
Fjarlægðu drenginn ekki úr strætó
Lýsing lögreglu á atvikinu í strætó er svohljóðandi: „Í dag var sérsveit ríkislögreglustjóra kölluð til aðstoðar við lögregluna á höfuðborgarsvæðinu þar sem ábending hafði borist um að sá eftirlýsti væri í strætisvagni í Reykjavík. För vagnsins var stöðvuð en þegar sérsveitarmenn fóru inn í vagninn þá sáu þeir strax að ekki var um að ræða einstaklinginn sem var verið að leita að og yfirgáfu þeir því vagninn.”
Af yfirlýsingu lögreglu að dæma var drengurinn ekki fjarlægður úr vagninum eins og lýst var í frétt Fréttablaðsins fyrr í dag.
Samkvæmt heimildum blaðsins treysti drengurinn sér ekki til að vera áfram í strætisvagninum eftir atvikið og hringdu félagar hans á leigubíl og fylgdu honum heim í bílnum.
Í tilkynningu lögreglu segir að móðir drengsins hafi haft samband við ríkislögreglustjóra eftir atvikið og lýst áhyggjum af þeirri stöðu sem upp væri komin, þar sem ungmenni í minnihlutahópi óttist að vera tekin í misgripum vegna útlits.
„Í samtalinu komu fram mikilvægar áherslur sem ríkislögreglustjóri ætlar að bregðast við, þar með talið samtal við samfélagið um fordóma.” segir í tilkynningunni um samtalið við móður drengsins.
Fordómar eigi aldrei rétt á sér
Þá segir í tilkynningunni að embættið hvetji til varkárni í samskiptum um þetta mál og önnur mál sem tengjast minnihlutahópum. „Fordómar eiga aldrei rétt á sér. Leit að hættulegu fólki má ekki verða til þess að minnihlutahópar í okkar samfélagi upplifi óöryggi eða ótta við að samferðafólk þeirra tilkynni það til lögreglu án tilefnis,” segir í tilkynningunni.
Tilkynning lögreglunnar í heild:
Lögregla leitar nú ungs manns sem tilheyrir minnihlutahópi á Íslandi, en hann strauk frá lögreglu og er talinn hættulegur. Í dag var sérsveit ríkislögreglustjóra kölluð til aðstoðar við lögregluna á höfuðborgarsvæðinu þar sem ábending hafði borist um að sá eftirlýsti væri í strætisvagni í Reykjavík. För vagnsins var stöðvuð en þegar sérsveitarmenn fóru inn í vagninn þá sáu þeir strax að ekki var um að ræða einstaklinginn sem var verið að leita að og yfirgáfu þeir því vagninn.
Móðir drengsins hafði samband við ríkislögreglustjóra í kjölfarið og lýsti áhyggjum af þeirri stöðu sem komin væri upp, þar sem ungmenni í minnihlutahópi óttist að vera tekin í misgripum vegna útlits. Í samtalinu komu fram mikilvægar áherslur sem ríkislögreglustjóri ætlar að bregðast við, þ.m.t. samtal við samfélagið um fordóma.
Ríkislögreglustjóra þykir leitt að drengurinn hafi í dag orðið hluti af þessum aðgerðum lögreglu en ábending barst um að hann væri sá sem var lýst eftir, sjálfur hafði drengurinn ekkert unnið sér til sakar.
Þá hvetur embættið til varkárni í samskiptum um þetta mál og önnur mál sem tengjast minnihlutahópum. Fordómar eiga aldrei rétt á sér. Leit að hættulegu fólki má ekki verða til þess að minnihlutahópar í okkar samfélagi upplifi óöryggi eða ótta við að samferðafólk þeirra tilkynni það til lögreglu án tilefnis.
Fordómafullar athugasemdir verða áfram fjarlægðar af miðlum lögreglunnar um málið og lokað verður fyrir frekari athugasemdir. Ábendingum sem tengjast málinu skulu eftir sem áður berast Lögreglunni í síma 112.
