Ríkisstofnanir hér á landi hafa á síðustu árum leitt launaþróun hjá sérfræðigreinum á borð við verkfræði og eiga einkareknar stofur orðið erfitt með að keppa við stofnanirnar um starfsfólk.

Þetta staðfestir ný könnun sem fyrirtækið Outcome framkvæmdi fyrir Samtök iðnaðarins meðal stjórnenda íslenskra verkfræðistofa, en hún sýnir að aukin sérfræðivinna innan opinbera geirans hafi dregið úr vexti einkafyrirtækja í greininni á síðustu tólf mánuðum.

„Sú var tíðin að verkfræðingar hjá ríkinu sættu sig við öruggari störf fyrir lægri laun en tíðkuðust á almennum markaði, en núna hefur ríkið tekið fram úr einkageiranum í þeim launakjörum sem eru í boði,“ segir Reynir Sævarsson, formaður Félags ráðgjafarverkfræðinga.

Hann segir þessa þróun hafa byrjað nokkrum árum eftir hrun þegar stofnanir fengu aukið fjármagn eftir mögru árin á undan, en þá hafi opinberi geirinn byrjað að stefna verkefnum inn á við.

„Núna auglýsa ríkisstofnanir mánaðarlega eftir verkfræðingum og öðrum sérfræðingum til starfa innan sinna raða,“ bætir Reynir við.

Niðurstöður könnunarinnar benda til þess að sakir fyrrgreindrar þróunar verði framboð af sérmenntuðu vinnuafli takmarkandi þáttur fyrir vöxt einkafyrirtækja í greininni á næstu misserum.

„Þetta er bagalegt fyrir verkfræðistofur landsins, sem verða af sínum reynslumestu sérfræðingum og þurfa eiginlega að byrja upp á nýtt með nýútskrifuðu fólki,“ segir Reynir, sem segir þetta ekkert spara þegar upp er staðið fyrir ríkið, en samfélagið verði af miðlægri þjónustu sérfræðinga fyrir vikið. Hann segir þetta draga úr krafti og vaxtargetu stofanna og nefnir sem dæmi Eflu, sem hafi flutt út verkvit fyrir tuttugu milljarða frá árinu 2009, en sú fjármunamyndun sé í hættu vegna spekileka sérfræðinga í faðm ríkisins.

Könnunin var gerð í maí í ár á meðal 25 verkfræðistofa og var svarhlutfallið 48 prósent. Velta hjá fyrirtækjum sem svara könnuninni var 22,8 milljarðar króna á síðustu tólf mánuðum og er það ríflega 57 prósent af heildarveltu allra fyrirtækja í greininni.