Reyndur kafari varpar fram kenningu um hvarfið

Ekkert hefur spurst til 45 ára breskrar konu, Nicolu Bull­ey, síðan að morgni föstu­dagsins 27. janúar síðast­liðinn.

Hvarf hennar hefur vakið mikla at­hygli í breskum fjöl­miðlum. Fyrr þennan ör­laga­ríka morgun hafði Nicola skutlað dætrum sínum í skólann áður en hún fór í göngu­túr með heimilis­hundinn Will­ow með­fram ánni Wyre sem rennur í gegnum bæinn St Michael‘s On Wyre.

Nicola sást á göngu klukkan rúm­lega níu að morgni föstu­dagsins en klukku­tíma síðar fannst hundurinn Will­ow einn á gangi skammt frá. Þá fannst sími Nicolu og beisli hundsins á bekk við ána. Nicola var aftur á móti hvergi sjáan­leg og virtist hrein­lega hafa horfið spor­laust.

Ýmsum kenningum hefur verið varpað fram um hvarfið og til að byrja með þótti lög­reglu lík­legt að hún hafi dottið í ána og drukknað. Mögu­lega hefði verið um slys að ræða, henni skrikað fótur eða hún hrein­lega fallið í yfir­lið og dottið út í. Kafarar og björgunar­sveitir hafa leitað í ánni og með­fram henni undan­farna daga en án árangurs.

Peter Faulding, reynslu­mikill kafari og stofnandi Specialist Group International, fyrir­tækis sem fengið var til að að­stoða við leitina í gær, sagði í sam­tali við Good Morning Britain í morgun að dagurinn í dag myndi ef til vill leiða ýmis­legt í ljós.

Varpar hann þeirri kenningu fram að ef Nicola finnst ekki í ánni í dag sé nánast úti­lokað að hún hafi dottið í hana. Þar af leiðandi mætti draga þá á­lyktun að ein­hver utan­að­komandi beri á­byrgð á hvarfi hennar.

Peter hefur fengist við leitir af þessu tagi í 20 ár og hann segist aldrei hafa glímt við jafn ó­venju­legt mál. Hann segist hafa þá til­finningu að Nicola hafi ekki farið í ána og mögu­leiki sé á að henni hafi verið rænt. Lög­regla hefur unnið út frá þeirri kenningu að hún hafi dottið í ána en hefur ekki viljað úti­loka aðra mögu­leika.

Peter sagðist hafa rætt við eigin­mann Nicolu, Paul, í gær­kvöldi og spurt hann hvort Nicola hefði átt ein­hverja ó­vini. Hann hafi svarað þeirri spurningu neitandi og bent á að hún hafi verið eðli­leg kvöldið áður en hún hvarf og ekkert bent til þess að eitt­hvað ó­eðli­legt væri á seyði.

Peter benti á að áin væri straum­lítil og Nicola gæti ekki hafa farið langt, hafi hún á annað borð dottið í ána og drukknað. „Vana­lega, í svona kring­um­stæðum, finnum við við­komandi þar sem hann fór út í. Hún hefði ekki færst langt, mögu­lega nokkra metra. Þetta er mjög skrýtið. Á mínum tuttugu árum í þessum bransa hef ég komið að mörgum málum, en engu jafn ó­venju­legu og þessu.“