Icelandair aflýsir 24 brottförum til og frá Evrópu á morgun, fimmtudaginn 23. janúar, vegna slæmrar veðurspár. Raskanir á flugi mun hafa áhrif á ríflega þrjú þúsund farþega. Þetta kemur fram í tilkynningu sem Icelandair sendi frá sér í dag.

Einnig hefur verið tekin ákvörðun um að seinka brottförum á flugi frá Bandaríkjunum til Íslands í kvöld. Brottfarir til og frá Evrópu eru enn á áætlun en gera má ráð fyrir seinkunum á þeim að sögn Icelandair.

„Starfsfólk Icelandair er þessa stundina að upplýsa farþega um þessar breytingar á flugáætlun vegna veðurs. Það er mikið álag á þjónustuveri Icelandair vegna þessa en við biðjum farþega um að sýna okkur biðlund en við erum að vinna í að finna ný flug fyrir alla okkar farþega. Við gerum okkar allra besta að koma viðskiptavinum okkar á áfangastað eins fljótt og hægt er með öryggi allra í fyrirrúmi. Allir farþegar verða sjálfkrafa endurbókaðir og ný ferðaáætlun verður send á netfang þeirra. Það er ekki nauðsynlegt að hafa samband við okkur nema ef nýja ferðaáætlun hentar ekki.“ segir Ingibjörg Ásdís Ragnarsdóttir, forstöðumaður þjónustu og upplifunar hjá Icelandair.

Búist er við slæmu veðri næsta sólarhringinn og eru  farþegar beðnir um að fylgjast með upplýsingum frá Icelandair inn á heimasíðu félagsins.

Búið er að aflýsa eftirfarandi flugum 23. janúar:

Flug FI532/FI533 til og frá Munchen
Flug FI568/FI569 til og frá Zurich
Flug FI520/FI521 til og frá Frankfurt
Flug FI554/FI555 til og frá Brussel
Flug FI430/FI431 til og frá Glasgow
Flug FI342/FI343 til og frá Helsinki
Flug FI306/FI307 til og frá Stokkhólmi
Flug FI318/FI319 til og frá Osló
Flug FI206/FI207 til og frá Kaupmannahöfn
Flug FI440/FI441til og frá Manchester
Flug FI416/FI417 til og frá Dublin
Flug FI 450/451 til og frá London Heathrow

Eftirfarandi flug fara í seinkun:

Flug FI470/ FI471 til og frá London Gatwick
Flug FI500/FI501 til og frá Amsterdam
Flug FI542/FI543 til og frá París, Charles De Gaulle
Flug FI204/ FI205 til og frá Kaupmannahöfn