Stefnt er á að bæta við 100 nýjum römpum í miðborg Reykjavíkur á þessu ári til að bæta aðgengi hreyfihamlaðra. Ríkisstjórnin samþykkti í dag að veita þriggja milljóna króna styrk af ráðstöfunarfé sínu til að styðja við stofnun Aðgengissjóðs Reykjavíkur. Greint er frá í tilkynningu.
Byrjað verður í miðborg Reykjavíkur þar sem elstu húsin eru og aðgengið verst. Ráðgert er að sjóðurinn veiti styrki fyrir allt að 80 prósent af kostnaði við gerð rampa eða upphækkana að verslunum og veitingastöðum.
„Með römpunum verður öllum gert kleift að sækja veitingastaði og verslanir þátttakenda í Reykjavík. Unnið verður í góðu samstarfi við eigendur viðkomandi bygginga og skipulagsyfirvöld en borgin er stofnaðili að verkefninu og mun tryggja góðan framgang þess,“ segir í tilkynningu.
Sjóðnum er ætlað að auka aðgengi hreyfihamlaðra að þjónustu, verslunum og veitingahúsum í Reykjavík en félagsmálaráðuneytið mun einnig styrkja verkefnið um tvær milljónir króna.
Fyrsta markmið sjóðsins er að gera 100 rampa á einu ári en verkefninu „Römpum upp Reykjavík“ var ýtt úr vör í Iðnó í dag, á degi aðgengis fyrir alla. Þar tóku til máls Katrín Jakobsdóttir forsætisráðherra, Guðni Th. Jóhannesson, forseti Íslands, Dagur B. Eggertsson borgarstjóri og Haraldur Þorleifsson, stofnandi Ueno og hvatamaður að stofnun sjóðsins.
