Rakel Þorbergsdóttir, fréttastjóri Ríkisútvarpsins, hefur ákveðið að láta af störfum um næstu áramót en hún hefur gegnt starfi fréttastjóra í tæp átta ár, frá 2014.

Þetta kemur fram í fréttatilkynningu frá RÚV.

,,Um áramót verða tæp átta ár síðan ég tók við fréttastjórastarfinu og 22 ár sem ég hef starfað á fréttastofum RÚV. Þessi ár hafa verið afar lærdómsrík, krefjandi og skemmtileg. Ákvörðun mín var því ekki auðveld, fréttastofan er frábær vinnustaður en það er öllum hollt að breyta til og takast á við nýjar áskoranir.

Starfsemin er í traustum höndum úrvals samstarfsfólks sem hefur staðið sig frábærlega á mjög krefjandi tímum. Allar mælingar staðfesta að fréttastofa RÚV er sá miðill sem þjóðin reiðir sig á, treystir og leitar til, sérstaklega þegar mikið liggur við.

Ég er gríðarlega stolt af frammistöðu okkar fólks og það hefur verið heiður að fá að stýra þessari öflugu og rótgrónu fréttastofu síðustu ár. Ég kveð með söknuði og hlýju í garð minna góðu félaga á RÚV,“ er haft eftir Rakel í tilkynningunni.

Samkvæmt fréttatilkynningunni verður starf fréttastjóra auglýst laust til umsóknar fljótlega á nýju ári. Þangað til mun Heiðar Örn Sigurfinnsson, varafréttastjóri, gegna starfi fréttastjóra frá því að Rakel lætur af störfum um áramótin og þar til nýr fréttastjóri hefur verið ráðinn.

Í starfi sínu sem fréttastjóri hefur Rakel leitt fréttastofuna í gegnum miklar breytingar. Sérstaklega er minnst á breytingar í starfsumhverfi fréttastofunnar. Þá varð fréttaskýringaþátturinn Kveikur einnig til undir hennar stjórn en RÚV hefur lagt aukna áherslu á ítarlegar og vandaðar fréttaskýringar.

Til gamans má geta var Rakel fyrsti fréttastjóri RÚV til að ,,dabba“ í beinni útsendingu frétta.

Eftirminnilegar myndir úr fréttum RÚV frá árinu 2016 en þarna sést Rakel ,,dabba“ í lok frétta.

„Rakel hefur leitt fréttastofuna undanfarin ár af mikilli fagmennsku og öryggi og fest hana í sessi sem þann fréttamiðil sem fólk ber mest traust til. Hún hefur sýnt framsýni í störfum sínum og lagt mikilvægan grunn undir starfsemi fréttastofunnar til næstu ára.

Fyrir hönd Ríkisútvarpsins færi ég henni hlýjar kveðjur og þakkir fyrir hennar mikilvæga framlag og frábæru störf á liðnum árum og óska henni alls hins besta í framtíðinni,“ er haft eftir Stefáni Eiríkssyni, útvarpsstjóra, í tilkynningunni.