Ragnheiður Ásta Pétursdóttir, fyrrverandi útvarpsþula hjá Ríkisútvarpinu, er nú látin en Ragnheiður starfaði hjá Ríkisútvarpinu í 44 ár áður en hún lét af störfum árið 2006. RÚV greinir frá þessu en Ragnheiður var 79 ára þegar hún lést.

Hún bauð sig fram fyrir Sósíalistaflokkinn í borgarstjórnarkosningunum í Reykjavík árið 2018 en hún var þar í 31. sæti listans. Fyrir kosningarnar rak hún sögu sína á vef flokksins þar sem hún sagðist alltaf hafa verið róttækari en foreldrar sínir og krafðist jöfnuðar í þjóðfélaginu.

Foreldrar Ragnheiðar voru þau Pétur Pétursson og Ingibjörg Birna Jónsdóttir en Pétur var einnig þulur hjá Ríkisútvarpinu og sagðist Ragnheiður nánast hafa alist upp hjá Ríkisútvarpinu.

Maður hennar, Jón Múli Árnason heitinn, var sömuleiðis þulur auk þess að vera tónskáld en þau áttu eitt barn saman, hana Sólveigu Önnu Jónsdóttur sem í dag er formaður Eflingar.

Hún átti einnig þrjú börn frá fyrra hjónabandi, Pétur Gunnarsson, blaðamann, sem er nú látinn, Eyþór Gunnarsson, tónlistarmann, og Birnu Gunnarsdóttur, verkefnisstjóra hjá Háskóla Íslands.